भारत र पाकिस्तानबीचको तनाव उत्कर्षमा पुगेपछि दुवै देशलाई अमेरिकाको फोन

काठमाडौं । नेपालका दुई छिमेकी राष्ट्रहरू भारत र पाकिस्तानबीचको जारी तनाव उत्कर्षमा पुगेपछि अमेरिकाले दुई पक्षसँग टेलिफोन कुराकानी गरेको छ ।

अमेरिकी विदेशमन्त्री मार्को रुबियोले भारतीय विदेशमन्त्री डा. एस जयशङ्कर र पाकिस्तानी सेना प्रमुख जनरल आसिम मुनिरसँग कुराकानी गरेका हुन् ।

भारतीय विदेशमन्त्री जयशङ्करले अमेरिकी समकक्षी रुबियोसँग आफ्नो कुराकानी भएको जानकारी दिएका छन् ।

कुराकानीबारे जानकारी दिँदै उनले सामाजिक सञ्जाल ‘एक्स’ मा लेखेका छन्, ‘आज बिहान अमेरिकाका विदेशमन्त्री मार्को रुबियोसँग कुराकानी भयो । भारतको दृष्टिकोण सधैँ संयमी र जिम्मेवार छ र भविष्यमा पनि यस्तै रहने छ ।’

यसैबीच, अमेरिकाले पनि भारतीय विदेशमन्त्री जयशङ्करसँग भएको वार्ताको बारेमा विज्ञप्ति जारी गरेको छ ।
विज्ञप्तिमा भनिएको छ, ‘अमेरिकाका विदेशमन्त्री मार्को रुबियोले भारतीय विदेशमन्त्री जयशङ्करसँग छलफल गरे । उनले दुवै पक्षले प्रत्यक्ष कुराकानीमार्फत गलतफहमी घटाएर तनाव कम गर्नुपर्नेमा जोड दिए ।’

साथै, अमेरिकी विदेशमन्त्री रुबियोले भविष्यमा कुनै पनि विवाद नहोस् भन्ने उद्देश्यले दुई देशलाई संवादमा ल्याउन मद्दत गर्न सक्ने बताए ।

त्यस्तै, अमेरिकाले पाकिस्तानी सेना प्रमुख आसिम मुनीरसँग भएको वार्ताको बारेमा पनि विज्ञप्ति जारी गरेको छ ।

विज्ञप्तिमा भनिएको छ, ‘विदेशमन्त्री रुबियोले आज बिहान पाकिस्तानी सेना प्रमुख मुनीरसँग कुरा गरे । उनले दुवैतर्फबाट तनाव घटाउने उपाय खोज्न आग्रह गरे र भविष्यमा टकराव नआओस् भन्ने उद्देश्यले अमेरिकाले वार्ता सुरु गराउन मद्दत गर्ने प्रस्ताव राखे ।’