आजदेखि बन्दीपुर केवलकारको आईपीओ निष्कासन

काठमाडौं । बन्दीपुर केवलकार एण्ड टुरिजम लिमिटेडले आजदेखि साधारण सेयर (आईपीओ) निष्काशन गरेको छ ।

कम्पनीले पहिलो चरणमा आयोजना प्रभावित क्षेत्रका स्थानिय र रोजगारीका लागि विदेशमा रहेका नेपालीका लागि आईपीओ निष्काशन गरेको हो ।

कम्पनीले जारी पूँजी २ अर्ब ८३ करोड रुपैयाँको २०.७० प्रतिशत अर्थात ५८ करोड ६० लाख रुपैयाँको ५८ लाख ६० हजार कित्ता सेयर निष्काशन गर्ने अनुमति पाएको छ । प्रति सेयर सय रुपैयाँका दरले ५ करोड ६६ लाख रुपैयाँको ५ लाख ६६ हजार कित्ता सेयर आयोजना प्रभावित स्थानियका लागि निष्काशन गरेको हो ।

कम्पनीले तनहुँ जिल्लाको बन्दीपुर गाउँपालिकाका सबै वडा, आँबुखैरेनी गाँउपालिकाका सबै वडा, भानु नगरपालिका- १ तथा गोरखा जिल्लाको पालुङ्गटार नगरपालिका- ७ का स्थानिय बासिन्दाले आवेदन दिन पाउनेछन् ।

यस्तै ५ करोड २९ लाख ४० हजार रुपैयाँको ५ लाख २९ हजार ४०० कित्ता सेयर रोजगारीका लागि विदेशमा रहेका नेपालीका लागि निष्कासन गरेको छ । आईपीओमा न्यूनतम १० कित्तादेखि अधिकतममा २० हजार कित्तासम्म आवेदन दिन सकिने छ ।

आयोजना प्रभावित स्थानियका लागि साउन २० गते हुनेछ । उक्त अवधिमा माग अनुसार आवेदन नपरेमा भदौ ४ गतेसम्म आवेदन दिन सकिने छ । वैदेशिक रोजगारीमा रहेका नेपालीले साउन ९ गतेसम्म आवेदन दिन सक्नेछन् । उक्त अवधिमा माग अनुसार आवेदन नपरेमा साउन २० गतेसम्म आवेदन दिन सकिने छ ।

कम्पनीको बिक्री प्रबन्धकमा नेपाल एसबिआई मर्चेण्ट बैंकिङ्ग रहेका छ । स्थानीयले बन्दीपुर गाँउपालिका-४, आँबुखैरेनी गाँउपालिकाको कार्यालय, भानु नगरपालिका- १ को कार्यालय र पालुङ्गटार नगरपालिका- ७ को कार्यालयबाट आवेदन दिन सक्नेछन् ।

वैदेशिक रोजगारीमा रहेका नेपालीहरुले नेपाल धितोपत्र बोर्डबाट अनुमति पाएका सी आश्वा सदस्य रहेका बैंक तथा वित्तीय संस्था र मेरो सेयर मार्फत आवेदन दिन सक्नेछन् ।