इटहरी सेन्टर प्लाजाकाे आगलागी करिब ६ घन्टापछि नियन्त्रणमा

विराटनगर । सुनसरीको इटहरी चोकमा रहेको सेन्टर प्लाजामा  लागेकाेआगलागी पूर्ण रूपमा नियन्त्रणमा आएको छ ।

इटहरीमा रहेको सेन्टर प्लाजामा चैत १३ गते बुधबार बिहान ९ बजेर ३० मिनेट देखि लागेको आगो ३ बजे आसपासम नियन्त्रणमा आएको हो ।

बिहानदेखि सुरू भएको आगलागी लगभग ६ घन्टापछि नियन्त्रणमा आएको छ।

जिल्ला प्रहरी कार्यालय सुनसरीका प्रवक्ता एवं प्रहरी नायव उपरीक्षक योगराज खतिवडाका अनुसार आगो निभाउन विभिन्न स्थानीय तहका १२ दमकल तथा झण्डै तीन सयको सङ्ख्यामा नेपाल प्रहरी, सशस्त्र प्रहरी बल र नेपाली सेना परिचालन गरिएको थियो ।

भवन ठूलो भएकाले आगो निभाउन बढी समय लागेको उनले बताए । के कारणले आगो लागेको भन्नेबाचरे प्रहरीले अनुसन्धान गरिरहेको छ । आगलागीबाट भएको क्षतिको विवरण प्राप्त नभएको प्रहरीले जनाएको छ ।

आगलागीमा फसेकाको उद्धारका लागि गृह मन्त्रालयले काठमाडौँबाट नेपाली सेनाको हेलिकोप्टर पठाएको थियो । आगलागी भएको भवनबाट ११ जनाको सकुशल उद्धार गरिएको थियो ।

प्रहरी नायव उपरीक्षक खतिवडाका अनुसार उद्धार गरिएकामा बङ्गलादेशका एमडी जय, अमेरिका राई, लक्ष्मी श्रेष्ठ, विजय धामी, विष्णु तामाङ, सञ्जय जैसवाल, दिया राय, विशाल सिंह, आशिष चौधरी र अन्य दुई जना रहेका छन् । उनीहरु सबैको स्वास्थ्य अवस्था सामान्य रहेको प्रहरीले जनाएको छ ।