जडीबुटी केन्द्रको अवलोकन गर्दै वनमन्त्रीले भने– छिट्टै सञ्चालनमा आउँछ

काठमाडौँ । वन तथा वातावरणमन्त्री ऐनबहादुर शाही ठकुरीले यही चैत १५ गते आन्दोलनका क्रममा जलाइएको जडीबुटी उत्पादन तथा प्रशोधन केन्द्रको निरीक्षण गरेका छन् । उनका साथमा काठमाडौँ क्षेत्र न २ की प्रतिनिधिसभा सदस्य सोविता गौतम पनि अवलोकनमा सहभागी थिइन् ।

मन्त्री ठकुरी र सांसद गौतमले जडिबुटीस्थित प्रशोधन केन्द्र पुगेर जलेर भग्नावशेष भएका भौतिक संरचनाको अवलोकन गरेका हुन् । यही चैत १५ गते पूर्वराजा ज्ञानेन्द्र शाहका समर्थकहरूको आन्दोलनका क्रममा प्रदर्शनकारीले आगो लगाउँदा प्रशोधन केन्द्र भग्नावशेष बनेको हो । त्यहाँ रहेका सवारीसाधन जलाइएको थियो भने करोडौँको रुपैयाँ बराबरको क्षति भएको छ ।

सो अवसरमा प्रशोधन केन्द्रका महाप्रबन्धक सङ्गीता यादवलगायत पदाधिकारीले आगलागीबाट क्षति भएको भग्नावशेषको अवलोकन गराउँदै क्षतिबारे उनीहरूलाई जानकारी गराएका थिए ।

निरीक्षणपछि मन्त्री शाहीले छिटोभन्दा छिटो सञ्चालन गर्न गृहकार्य भइरहेको बताए । ‘प्राविधिक र विज्ञ राखेर छलफल गरिरहेका छौँ । १० करोड रुपैयाँ बजेट भए अस्थायी रूपमा सञ्चालन गर्न सकिन्छ । यसबारे मन्त्रिपरिषद्मा छलफल भएको छ । चाँडै रकम उपलब्ध हुन्छ,’ उनले भने ।

क्षतिबारे सहरी विभागले मूल्याङ्कन गरिरहेको र चाँडै पुनर्निर्माण प्रक्रिया अगाडि बढ्ने मन्त्री शाहीको भनाइ थियो । ‘उत्पादन बढाउने र रोजगारलाई सुनिश्चित गर्ने सवालमा हामी सबै प्रक्रिया पूरा गरेर पुनःसुरु गर्छौँ,’ उनले भने ।

सांसद गौतमले आगो लगाउनेलाई सरकारले कानुनी दायरामा ल्याउनुपर्ने बताइन् । प्रशोधन केन्द्रलाई घना बस्तीबाट अन्यत्र सार्नुपर्ने उनको सुझाव थियो ।

प्रशोधन केन्द्रका महाप्रबन्धक यादवले नयाँ उत्पादनको तयारी गरिरहेका बेला आगो लाग्दा ठूलो क्षति भएको बताइन् । उनका अनुसार उद्योगको दुई भवन र १३ गाडी जलेर क्षति भएको छ । २८ करोड रुपैयाँको क्षति भएको प्रारम्भिक अनुमान गरिएको महाप्रबन्धक यादवले बताए । प्रशोधन केन्द्रका कर्मचारीले उत्पादन बन्द हुँदा बेरोजगार हुने मन्त्री शाही र सांसद गौतमले समक्ष चिन्ता व्यक्त गरेका थिए ।