पक्राउ परेका जोशीलाई बुद्ध एयरको फ्लाइटबाट पोखरा पुर्‍याइयो

काठमाडौं। नेपाल प्रहरीका पूर्वप्रहरी नायब महानिरीक्षक छविलाल जोशीलाई प्रहरीले पक्राउ गरेर पोखरा पठाएको छ ।

जोशीलाई आज काठमाडौँबाट पक्राउ गरेको प्रहरी प्रवक्ता एवं प्रहरी नायब महानिरीक्षक दानबहादुर कार्कीले जानकारी दिए । सूर्यदर्शन सहकारी लगायतका विषयमा सोधपुछ गर्न जोशीलाई पक्राउ गरिएको उनले बताए ।

गोर्खा मिडिया नेटवर्कका तत्कालीन सञ्चालक समितिका सदस्य जोशीलाई आजै साँझ बुद्ध एयरको फ्लाइटबाट पोखरा पुर्‍याइएको हो ।

सहकारी संस्थाका बचत अपचलनमा संसदीय विशेष छानबिन समितिले कारबाही गर्न सिफारिस गरेपछि पक्राउ परेका जोशीलाई पोखरा लगिएको हो ।

जरूरी पक्राउ पुर्जी थमाएर पक्राउ गरिएका जोशीलाई सोमबार जिल्ला अदालत कास्कीमा उपस्थित गराउने तयारी छ ।