काठमाडौं । कैलाश हेलिकोप्टर सर्भिसेज लिमिटेडका प्रबन्ध निर्देशक प्रतापजंग पाण्डेले ‘एअरलाइन्स लिडर अफ द इयर अवार्ड, २०२५’ प्राप्त गर्नुभएको छ ।
कर्पोरेट म्यागजिनले उहाँलाई सो अवार्ड प्रदान गरेको हो ।
बिहीबार काठमाडौंको लाजिम्पाटस्थित र्याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा उहाँलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।
कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।
प्रतापजंग पाण्डे र कैलाश हेलिकोप्टरबारे
व्यावसायिक र औद्योगिक पृष्ठभूमिका पिता प्रदीपजंग पाण्डे र माता स्वर्गीय उर्मिला पाण्डेबाट माहिलो सन्तानका रूपमा वि.स. २०३० साल पुस २१ गते जन्मिनुभएका प्रतापजंग पाण्डे कैलाश हेलिकोप्टर सर्भिसेज लिमिटेडका प्रबन्ध निर्देशक तथा एअरलाइन्स अपरेटर्स एसोसिएशन अफ नेपाल (एओएएन) को प्रथम उपाध्यक्ष हुनुहुन्छ । उहाँ नेपालको व्यावसायिक क्षेत्र खासगरी बैंकिङ र उड्डयन क्षेत्रमा निकै सफल नेतृत्व मानिनुहुन्छ ।
पानीखोपरीस्थित भानुभक्त मेमोरियल स्कुलबाट २०४५ सालमा एसएलसी उत्तीर्ण गर्नुभई उहाँले शंकरदेव क्याम्पसबाट आईकम र पिपल्स क्याम्पसबाट बीकम गर्नुभयो भने फिलिपिन्स क्रिश्चियन युनिभर्सिटीबाट मास्टर इन बिजनेश एड्मिनिष्ट्रेशन (एमबीबीएस) गर्नुभयो । अध्ययनसँगै लोमस फर्मास्युटिकल्समा फाइनान्स अफिसर हुँदै मार्केटिङ म्यानेजरबाट काम सुरू गर्नुभएका उहाँसँग बैंक तथा वित्तीय संस्थाहरूको विभिन्न तहमा रहेर लामो समय काम गरेको अनुभव छ ।
सिभिल बैंकमा सञ्चालक तथा अध्यक्ष, आईएमई जनरल इन्स्योरेन्समा सञ्चालक, आईएलएफसीओ माइक्रोफाइनान्समा अध्यक्ष भएर काम गरिसक्नुभएका उहाँ पछिल्लो समय हिमालयन बैंकको सञ्चालक हुनुहुन्छ । साथै, डिमाटर एग्रो र सेलेन हस्पिटालिटीमा पनि सञ्चालकको भूमिकामा हुनुहुन्छ ।
माओवादीले गरेको १० वर्षे जनयुद्ध, भारतले गरेको नाकाबन्दी, ऊर्जा सङ्कटका कारण सिर्जित चरम लोडसेडिङ तथा विनाशकारी भूकम्प र कोभिड–१९ महामारीजस्ता प्राकृतिक प्रकोपहरू मुलुकले भोगेको निकै ठूला समस्या हुन् । ती सबै समस्याहरूसँग सिँगौरी खेल्दै उहाँले आफू संलग्न रहेका कम्पनीहरूलाई निरन्तर गति दिइराख्नुभएको छ । सन् २०१७ मा दुई वटा हेलिकोप्टरबाट सेवा सुरू गरिएकामा अहिले तीन वटा पुर्याइएको छ । त्यस्तै, कम्पनीलाई पब्लिक लिमिटेडमा रूपान्तरण गरी आईपीओमार्फत आम सर्वसाधारणलाई समेत सहभागिताका लागि बाटो खुला गरेको छ ।
नेतृत्व र रणनीतिक योजना, वित्तीय व्यवस्थापन र जोखिम मुल्याङ्कन, व्यवसाय विकास र वृद्धिका रणनीतिहरू तथा उत्कृष्ट सञ्चार कौशल क्षमता राख्नुहुने उहाँ प्रसिद्ध प्रवल जनसेवा श्रीबाट विभूषित हुनुहुन्छ । यस्तै, जापान, दक्षिण कोरिया, अष्ट्रेलिया, मलेसिया र ग्रीसलगायत देशहरूबाट व्यवसायसँग सम्बन्धित विभिन्न तालिम हासिल गर्नुभएको छ ।
हेर्नुहोस् भिडिओ–
FACEBOOK COMMENTS