कपनको साततले क्षेत्रमा महानगरको डोजर पुगेपछिको स्थानीयको विरोध

काठमाडौं । काठमाडौं महानगरपालिकाको डोजर कपनमा खहरे खोला अतिक्रमण गरेर बनेका घर हटाउने भन्दै पुगेपछि स्थानीयले विरोध गरेका छन्।

काठमाडौं महानगरपालिका १० र बूढानीलकण्ठ नगरपालिका वडा नम्बर ७ को सिमानामा रहेको साततले चोक नजिकैको खोला मिचेर घर बनाएको, सेटब्याक नछोडी खोला मिचेको पाइएकाले त्यो भत्काउन आएको महानगर प्रहरीका डिएसपी मिनबहादुर थापाले बताए ।

उनले सामाखुसी खोला जसरी नै यो खोला पनि खोल्ने योजना रहेको बताए ।

तर बूढानीलकण्ठ नगरपालिका र त्यहाँका स्थानीयबासिन्दाले डोजर चलाउन दिएका छैनन् । वर्षाको समयमा डोजर आतंक गरेको भन्दै उनीहरुले महानगरविरुद्ध नाराबाजी गरिरहेका छन् । जसका कारण डोजर चलाउन सकिएको छैन ।

अहिले काठमाडौं महानगरपालिका, बूढानीलकण्ठ नगरपालिका र स्थानीयबासिन्दाबीच छलफल भइरहेको छ ।