लघुवित्तका कर्मचारीलाई दले मोसो, यस्ताे छ लघुवित्त बैंकर्स संघको धारणा

काठमाडौं । लघुवित्त वित्तीय संस्थाका कर्मचारीलाई मोसो दलेको घटनाप्रति नेपाल लघुवित्त बैंकर्स संघले गम्भीर आपत्ति जनाएको छ ।

एनआईसी एसिया लघुवित्त वित्तीय संस्था जाजरकोट शाखामा कार्यरत कर्मचारी गोपालप्रसाद उपाध्यायलाई मंगलबार मोसो दलेका थिए । उक्त घटनाप्रति संघले गम्भीर आपत्ति जनाएको हो ।

उपाध्यायमाथि अज्ञात समूहले कुटपिटसहित मोसो दलेर अपमानजनक व्यवहार गर्नुका साथै समूहबाट संकलन भएको रकमसमेत लुटेर फरार भएको थियो । लघुवित्त वित्तीय संस्थाले ग्रामीण क्षेत्रमा बिनाधितो कर्जा उपलब्ध गराई विपन्न महिलाको जीवनस्तर माथि उकास्न निरन्तर लागिरहेको सन्दर्भमा भएको अमानवीय र अराजकताको पराकाष्ठ भएको संघको ठहर छ ।

घरदैलोमा वित्तीय सेवा प्रदान गर्न फिल्डमा खटिएका लघुवित्त वित्तीय संस्थाका कर्मचारीका लागि त शान्ति सुरक्षा झनै आवश्यक पर्ने भएकाले सुरक्षित रुपमा काम गर्ने वातावरणको सुनिश्चतता गर्न सरकार र नियामक निकाय नेपाल राष्ट्र बैंकसँग संघले अपिल गरेको छ ।

‘जनमानसमा नकारात्मक प्रभाव पार्ने, देशमा अराजकतालाई बढवा दिने, आर्थिक अस्थिरता निम्त्याउने र देशको अर्थतन्त्र नै दुर्घटनाग्रस्त हुने सम्भावना हुँदा यस्ता गतिविधि तत्काल बन्द गरी शान्तिपूर्ण काम गर्ने वातावरण सिर्जना गर्न सम्बन्धित सबै पक्षसँग अपिल गर्दछौं,’ संघका अध्यक्ष प्रकाशराज शर्माद्वारा जारी विज्ञप्तिमा भनिएको छ ।