युवाहरूलाई केपी ओलीको आह्वान : ‘आफ्नो देश अर्काले आएर बनाइदिँदैन, तपाईंहरू समर्पित हुनुस्’

‘उत्पादन र उत्पादकत्व बढाएर देशलाई सुदृढ पार्नुपर्छ, विप्रेषणमा भर पर्नु अर्थतन्त्रका लागि राम्रो होइन’

काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले युवा तथा विद्यार्थीलाई देशप्रति समर्पित हुन आह्वान गरेका छन् ।

एमाले काठमाडौँ जिल्ला कमिटीद्वारा आज खुल्लामञ्चमा आयोजित ‘युवा महोत्सव’मा उनले देश निर्माणका लागि युवाको सहभागिताको आवश्यकता औँल्याउदै देशलाई प्रेम गर्न आह्वान गरेका हुन् ।

‘आफ्नो देशलाई माया गरौँ । म भाइबहिनीहरुलाई भन्न चाहन्छु– कुनै पनि देश अर्काले आएर बनाइदिन्न, आफैले बनाउनुपर्छ,’ अध्यक्ष ओलीले भने ।

उनले देशमा विद्यमान समस्या समाधानका लागि युवाको भूमिका महत्वपूर्ण हुने बताए । ‘हाम्रा अघि समस्या छन्, युवा जनशक्ति विदेश पलायन भइरहेका छन् । यो समस्यासँग भाग्ने होइन जुधेर समाधान गर्ने हो,’ अध्यक्ष ओलीले भने, ‘देशमा निरकुंश राजतन्त्र र पञ्चायती तानाशाह थियो त्यसविरुद्ध हामी भागेको भए अहिले लोकतान्त्रिक गणतन्त्र यहाँ आउँदैनथ्यो ।’

देशको उत्पादन र उत्पादकत्व बढाएर सुदृढ हुनुपर्नेमा जोड दिँदै विप्रेषणमा भर पर्नु अर्थतन्त्रका लागि राम्रो नभएको अध्यक्ष ओलीको भनाइ थियो । उनले युवालाई सहज ढङ्गले रोजगारी उपलब्ध गराउनेदेखि उद्यमशीलतातिर प्रेरित गर्न आवश्यक रहेको धारणा व्यक्त गरे । उनले देशमा ज्येष्ठ नागरिकको सङ्ख्या बढदो र प्रजनन दर घट्दै गएकोप्रति चिन्ता समेत प्रकट गरेका छन् ।

महोत्सवमा एमाले काठमाडौँ जिल्ला कमिटीका अध्यक्ष दीपक निरौलाले राजनीतिमा युवाको सक्रिय सहभागितालाई जोड दिए । ‘सामाजिक परिवर्तनका लागि नेतृत्वमा युवा शक्ति’ भन्ने भावना जागृत गराउने लक्ष्यका साथ सुरु महोत्सवले ‘समृद्ध नेपाल, सुखी नेपाली’ को राष्ट्रिय आकाङ्क्षा पूरा गर्न युवा शक्तिलाई समाज रूपान्तरणका दिशामा अभिप्रेरित गराउन सहयोग उनको भनाइ थियो ।