एलओडी फेरि बन्यो उत्कृष्ट क्लब, विश्वकै उत्कृष्ट क्लबमध्ये ५०औँ स्थानमा पर्न सफल

काठमाडौं । ठमेलस्थित एलओडी क्लब (नाइट क्लब) फेरि विश्वकै उत्कृष्ट क्लबमध्ये ५० औँ स्थानमा परेको छ ।

युकेस्थित डिजे म्यागले छनौट गर्ने सन् २०२३ का लागि सय उत्कृष्ट क्लब क्याम्पियनमा एलओडी ५०औँ स्थानमा परेको हो । यसअघि यो क्लब ४९ र ५२औँ स्थानमा परेको थियो ।

केही समयअघि क्लब ‘डीजे म्याग टप १००’ को नोमिनेसनमा पनि एलओडी पर्न सफल भएको थियो । म्यागमा विश्वभरका सय उत्कृष्ट डीजे क्लबको सहभागी रहने गर्छ । डीजे म्यागले हरेक वर्ष विभिन्न मुलुकमा रहेका उत्कृष्ट क्लबहरूको छनौट गर्ने गर्छ । टप १०० क्लबको सूचीमा पर्न एलओडीले केही समयअघि भोट गर्न अपिल गरेको थियो ।

यसअघि सन् २०२२ का लागि ‘एलओडी’ सय क्लबले ५२औँ स्थानमा प्रवेश पाएको थियो । यस पटक पनि एलओडी डीजे म्याग टप १०० को छनौट भएर ५०औँ स्थानमा पर्न सफल भएको क्लबका अध्यक्ष रूदीप बल्ल श्रेष्ठले जानकारी दिए ।

उनका अनुसार क्याम्पियनमा पाँच सय क्लब सहभागी भएका थिए । केही दिनअघि विश्वका उत्कृष्ट क्लबहरूको श्रेणी स्थान सार्वजनिक गरिएको हो । सय वटा उत्कृष्ट क्लबहरूमध्येबाट ५०औँ स्थानमा पर्दा क्लब व्यवसायीहरूले पनि राष्ट्रको नाम चिनाउन सक्ने सन्देश गएको श्रेष्ठको भनाइ छ ।

एलओडी उत्कृष्ट क्लबको सूचीमा पर्दा विश्वरभरका क्लब पारखीले नेपालको नाम थाहा पाउने उनको भनाइ छ । काठमाडौं आउने एलओडी क्लब खोजी गर्नेको पनि संख्या बढिरहेको उनले बताए ।

क्लबलाई उत्कृष्ट स्थानमा पार्न सबै जनाको साथ र सहयोग रहेको उनले बताए । रात्रीकालीन जीवनका पारखीहरू तथा विदेशी पर्यटकहरूलाई यस क्लबले झनै आकर्षण गर्न सक्ने श्रेष्ठको भनाइ छ ।

सरकारले पछिल्लो समय ठमेललाई २४ घण्टा खुला गर्ने अनुमति दिएको छ । ठमेलका व्यवसायी पनि उत्साहित छन् । एलओडी क्लब आन्तरिक तथा बाह्य पर्यटकको आकर्षण बन्दै गएको छ ।