लुम्बिनी विकास बैंकलाई ‘डेभलपमेन्ट बैंक अफ द इयर अवार्ड’ (भिडिओ)

काठमाडौं । राष्ट्रियस्तरको विकास बैंक लुम्बिनी विकास बैंक लिमिटेडले ‘डेभलपमेन्ट बैंक अफ द इयर अवार्ड, २०२५’ प्राप्त गरेको छ ।

कर्पोरेट म्यागजिनले बैंकलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा बैंकलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले प्रमुख कार्यकारी अधिकृत (सीईओ) नरेशसिंह बोहरालाई अवार्ड प्रदान गर्नुभएको थियो ।

लुम्बिनी विकास बैंकबारे

लुम्बिनी विकास बैंक लिमिटेड नेपाल राष्ट्र बैंकबाट ‘ख’ वर्गको इजाजतप्राप्त राष्ट्रियस्तरको विकास बैंक हो । काठमाडौंको डिल्लीबजारमा केन्द्रीय कार्यालय रहेको यो बैंक २०७४ असार २५ मा स्थापना भएको हो । हाल चिन्तामणि भट्टराईको अध्यक्षतामा सञ्चालन भइरहेको यो बैंकका प्रमुख कार्यकारी अधिकृत (सीईओ) नरेशसिंह बोहरा हुनुहुन्छ ।

भाजुरत्न फाइनान्स लिमिटेड, वीरगञ्ज फाइनान्स लिमिटेड, हिमचुली विकास बैंक लिमिटेड, लुम्बिनी फाइनान्स एण्ड लिजिङ कम्पनी लिमिटेड र भिवोर विकास बैंक लिमिटेड गरी पाँचवटा बैंक तथा वित्तीय संस्था गाभिएर लुम्बिनी विकास बैंक बनेको हो । करिब चार अर्ब रुपैयाँ चुक्ता पुँजी रहेको बैंकले हाल ८९ वटा शाखा, एउटा एक्सटेन्शन काउन्टर, २० वटा एटीएम तथा ६०० भन्दा बढी कर्मचारीहरूमार्फत सेवा प्रदान गरिरहेको छ ।

बैंकले विभिन्न प्रकारका निक्षेप तथा कर्जा सुविधाहरू उपलब्ध गराउँदै आएको छ । यसमा चेक इन सेभिङ खाता, बालसुरक्षा बचत, अक्षयकोष बचत, नारी बचतजस्ता निक्षेप योजनाहरू छन् । कर्जा सुविधाहरूमा एग्रो प्लस लोन, वैदेशिक रोजगार ऋण, शेयर लोन र शिक्षा ऋण आदि समावेश छन् भने विभिन्न अस्पतालहरूसँगको सहकार्यमा ग्राहक तथा कर्मचारीहरूका लागि उपचार सेवामा छुट उपलब्ध गराउँदै आएको छ ।

सामाजिक उत्तरदायित्वअन्तर्गत बैंकले समुदायस्तरमा वित्तीय साक्षरतासम्बन्धी कार्यक्रमहरू गर्दै आएको छ । ‘निरन्तर सहयात्रा’ नाराका साथ उच्चस्तरीय, आधुनिक एवम् नवीनतम् प्रविधिसहितको सुरक्षित बैंकिङ सेवामार्फत आफ्नो उपस्थिति मजबुत बनाउँदै लगेको छ ।

नेपालको आर्थिक विकासमा वित्तिय सेवाको पहुँच विस्तार गर्ने लक्ष्य लिई कार्यरत लुम्बिनी विकास बैंकले ग्रामीणदेखि सहरी क्षेत्रसम्म वित्तीय समावेशीकरणलाई बढावा दिई साना–मझौला उद्यम, कृषि, शिक्षा, र ऊर्जाजस्ता क्षेत्रमा ऋण प्रवाह गरेर देशको आर्थिक विकासमा टेवा पुर्‍याएको छ ।

हेर्नुहोस् भिडिओ–