ज्ञानेन्द्रको सहमतिमै गणतन्त्र ल्याइएको हो, राजतन्त्र फर्किने दिवास्वप्न नदेखौँ : माधव नेपाल 

मोरङ ।  नेपाल कम्युनिष्ट पार्टी (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले मुलुकमा राजतन्त्रको औचित्य समाप्त भएको बताएका छन् ।

विराटनगर विमानस्थलमा सञ्चारकर्मीहरूसँग कुरा गर्दै उनले औचित्यहीन राजतन्त्र पुनर्स्थापना नहुने बताए ।

‘औचित्य समाप्त भएको राजतन्त्र फेरि फर्काउने दिवास्वप्नबाट मुक्त हुनुपर्छ,’ पूर्वराजा ज्ञानेन्द्र शाहको सहमतिमा नै सङ्घीय लोकतान्त्रिक गणतन्त्रात्मक शासन व्यवस्था लागू भएको स्पष्ट गर्दै उनले भने ।

फरक प्रसङ्गमा नेता नेपालले संविधान संशोधन आवश्यक भएको बताए । साथै उनले नेपाल कम्युनिष्ट पार्टी (एमाले) सँग तत्काल एकताको सम्भावना नरहेको स्पष्ट गरे ।