जाजु ग्रुपका अध्यक्ष महेश कुमारलाई ‘कर्पोरेट इन्डष्ट्री लिडर अवार्ड’ (भिडिओ)

काठमाडौं । नेपालको अग्रणी औद्योगिक तथा व्यापारिक समूह जाजु ग्रुपका अध्यक्ष महेश कुमार जाजुले ‘कर्पोरेट इन्डष्ट्री लिडर अवार्ड’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार र्‍याडिसन होटेलमा आयोजित १७औँ संस्करणको ‘कर्पोरेट बिजनेश अवार्ड’ समारोहमा उहाँलाई ‘बेष्ट अटोमोटिभ एक्सिलेन्स’ अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासंघ (एफएनसीसीआई) की पूर्व अध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

महेश कुमार जाजुबारे

औद्योगिक पृष्ठभूमिको परिवारमा वि.स. २०२० असार २३ गते विराटनगर–७ मोरङमा जन्मिुभएका महेश कुमार जाजु नेपालको अग्रणी औद्योगिक तथा व्यापारिक समूह जाजु ग्रुपका अध्यक्ष हुनुहुन्छ । महेन्द्र मोरङ आदर्श बहुमुखी क्याम्पसबाट ग्राजुएशन गर्नुभएका उहाँले बुबालाई व्यापारमा सघाउनका लागि बीचैमा अध्ययन छाड्नुभयो । बुबालाई व्यापारमा सघाउँदै जाँदा उद्योग तथा व्यापारको क्षेत्र रूचिको विषय बन्न पुग्यो । फलस्वरुप उहाँलाई आज उद्योगपतिको पहिचान प्राप्त भएको छ । यो पहिचानको श्रेय आफ्ना स्वर्गीय पिता–माता रमानन्द जाजु र हरप्यारी देवी जाजुलाई दिनुहुन्छ ।

परिवारले सुरू गरेको कपडाको होलसेल र खुद्रा पसलबाट सुरू भएको महेश कुमार जाजुको व्यावसायिक यात्रा राइस र आयल तथा पल्स मिलको व्यवस्थापन हुँदै उद्योग स्थापना र आयात निर्यातको व्यापारसम्म आइपुगेको छ । उहाँले आफ्नै योजनामा बिस्कुट र साबुन उद्योग स्थापना गरी औद्योगिक यात्रा सुरू गर्नुभयो । उहाँ नेतृत्वको जाजु ग्रुपभित्र हाल एशियन थाइ फुड्स, हिमगिरी सप एण्ड केमिकल, एशियन बिस्कुट एण्ड कन्फेक्शनरी, गुडलाइफ बेभरेज, जाजु ब्रदर्स, एशियन इन्टरनेशनल र हिमगिरी रियल इस्टेटलगायत मूल्यवान कम्पनीहरू छन् ।

उद्योग व्यापारको क्षेत्रमा आरोह–अवरोह स्वाभाविक चरित्र भएको बुझाइ उहाँको छ । ‘धुम’ मच्छड धूप र गुरुगुट्खालगायत उत्पादन र कतिपय नयाँ प्रयोगहरूमा सफलता नपाउनुमा सरकारको कमजोरी देख्नुहुन्छ । नेपाली उत्पादनको ठूलो बजार भारतसहित तेस्रो मुलुकहरूमा भए पनि सरकारले प्रोत्साहन नगर्दा बजारीकरण हुन नसकेको उहाँको बुझाइ छ ।

जाजी ग्रुपअन्तर्गतका सबै कम्पनीहरूले आफ्नो सामाजिक उत्तरदायित्वअन्तर्गत बालविकास र कल्याणका साथै स्पोट्र्स, आट्र्स, कल्चर र धार्मिक–आध्यात्मिक गतिविधिहरू समेतमा सहयोग पुर्‍याउँदै आएको छ । उत्पादन बढाउँदै नेपाली अर्थतन्त्रलाई आत्मनिर्भर बनाउन उहाँ क्रियाशील हुनुहुन्छ । नेपाल उद्योग वाणिज्य महासंघको कार्यसमिति सदस्य भइसक्नुभएका उहाँ विभिन्न वाणिज्य र व्यापारिक चेम्बरहरुमा संलग्न रहनाका साथै राजनीतिमा पनि सक्रिय हुनुहुन्छ ।

मानवसेवा र व्यावसायिक उपलब्धिहरूमा गर्नुभएको योगदानहरूको कदरस्वरुप उहाँले नेशनल युथ अन्टरप्रेनर अवार्ड, नेशनल आइकन अफ नेपाल र कोशी एक्सिलेन्स अवार्डलगायत एक सय भन्दा बढी सम्मान र पुरस्कारहरू प्राप्त गर्नुभएको छ ।