राष्ट्रिय युवासंघको सचिव पदमा महमद निजामुदिनको बलियो दाबी

विभिन्न जिम्मेवारीमा रहँदा देखाएको वैचारिक परिपक्वता, सङ्गठनप्रतिको निष्ठा र नेतृत्व क्षमताले निजामलाई सङ्गठनभित्र विश्वासिलो र प्रभावशाली व्यक्तित्वको रूपमा स्थापित गराएको युवा संघकै नेताहरू बताउछँन्

काठमाडौं । राष्ट्रिय युवा संघ नेपालको केन्द्रीय सचिवालय सदस्य महमद निजामुदिन (निजाम) ले सचिव पदमा आफ्नो बलियो दाबी रहेको बताएका छन् ।

लामो समयदेखि सङ्गठनमा रहेर गरेको योगदान, हासिल गरेको अनुभव र कुशल नेतृत्व क्षमताका आधारमा उनले आफूलाई सचिव पदको दाबेदारका रूपमा प्रस्तुत गरेका हुन् । सङ्गठले दिएको जिम्मेवारी र भूमिकालाई सहर्ष स्वीकार गरी जिम्मेवारीबोधका साथ काम गर्दै आएको कारण पनि आफू स्वाभाविक रूपमा सचिव पदको दाबेदार रहेको उनको भनाइ छ ।

आफूले उम्मेदवार बन्ने घोषणा गरेको नभइ आकांक्षा मात्र प्रकट गरेको उनले बताए । सङ्गठनमा गरेको लामो योगदान, अनुभव र नेतृत्व क्षमताका आधारमा आफ्नो दाबी स्वाभाविक रहेको उनको भनाइ छ ।

युवा संघको युथफोर्स वीरगञ्जको अध्यक्षको जिम्मेवारीबाट केन्द्रीय सङ्गठनमा प्रवेश गरेका निजाम केन्द्रीय सदस्य हुँदै सङ्गठनको राष्ट्रिय तहमा स्थापित भएका व्यक्ति हुन् । निजामले युवा संघको मधेश प्रदेश इञ्चार्ज र सचिवालय सदस्यको जिम्मेवारी पूरा गरिसकेका छन् भने उनी संघको नवौँ राष्ट्रिय महाधिवेशनमार्फत उपमहासचिव सो सरहको पदमा निर्वाचित व्यक्ति हुन् ।

विभिन्न जिम्मेवारीमा रहँदा देखाएको वैचारिक परिपक्वता, सङ्गठनप्रतिको निष्ठा र नेतृत्व क्षमताले निजामलाई सङ्गठनभित्र विश्वासिलो र प्रभावशाली व्यक्तित्वको रूपमा स्थापित गराएको युवा संघकै नेताहरू बताउछँन् ।

विशेषतः सङ्गठनले गरेका हरेक कार्यक्रमको व्यवस्थापन तथा सङ्गठनका हरेक गतिविधि मितव्ययी ढङ्गबाट सञ्चालन गरेको भूमिकाले उनको क्षमताको धेरै नेताहरुले प्रशंसा गर्ने गरेका छन् । सचिव पदको आकांक्षी निजामले १०औं राष्ट्रिय महाधिवेशनमार्फत सचिवको उम्मेदवारीको औपचारिक घोषणा नगरेको भए पनि उनी सचिव पदका लागि सङ्गठनभित्र आफ्नो बलियो दाबेदारी पेश गरेर बसेका एक सशक्त विकल्प हुन् ।

संघको १०औँ राष्ट्रिय महाधिवेशनमार्फत यही जेठ ९ देखि ११ गतेसम्म पोखरामा हुँदैछ । महाधिवेशनले नौ जना पदाधिकारीसहित १५१ सदस्यीय केन्द्रीय कमिटी चयन गर्नेछ । केन्द्रीय कमिटीमा ३३ प्रतिशत महिलाको सुनिश्चिता गर्ने राष्ट्रिय युवा संघ नेपालले जनाएको छ ।

पदाधिकारी १० जना भन्दा कम बनाउने एमालेको नीति बमोजिम यो महाधिवेशनबाट १७ जना रहेको पदाधिकारी नौ जनामा सीमित बनाइनेछ । केन्द्रीय कमिटी पनि ३२९ बाट १५१ मा झारिने बताइएको छ ।