खानेपानी समस्या समाधानमा मन्त्रालय कटिबद्ध छ : खानेपानीमन्त्री यादव

काठमाडौँ । खानेपानीमन्त्री प्रदीप यादवले खानेपानीको क्षेत्रमा देखिएका समस्या दीर्घाकालीन रुपमा समाधान गर्न मन्त्रालय कटिबद्ध रहेको बताएका छन् ।

मन्त्रालयमा आज काठमाडौँ उपत्यका खानेपानी लिमिटेड (केयूकेएल) का प्रमुख कार्यकारी अधिकृत (सीईओ) तथा केयूकेएल कर्मचारी ट्रेड युनियनसँगको छलफल तथा बैठकमा उनले भने, ‘खानेपानीका क्षेत्रमा देखिएका समस्या समाधान गर्न मन्त्रालय आफ्नो क्षेत्रबाट लागिपरेको छ, आम नागरिकले सहज रूपमा खानेपानीको प्रयोग गर्न सक्ने गरी खानेपानीको व्यवस्थापन गरौँ ।’

सोही क्रममा मन्त्री यादवले काठमाडौँ उपत्यकामा सहज रूपमा खानेपानी वितरण, लिकेज भएका पाइपलाइन मर्मत, खानेपानीका मिटर वितरण गर्ने लगायतका कार्य छिटोछरितो गर्न आग्रह गरे । उनले भने, ‘खानेपानीका लिकेज भएका पाइप लाइन चाँडो मर्मत गर्नुहोला, नागरिकले खानेपानीका मिटर नपाएको गुनासो गर्दै आएका छन्, मिटरहरूको चाँडो व्यवस्था गर्न मेरो आग्रह छ ।’

खानेपानी मन्त्रालय काठमाडौँ उपत्यका खानेपानी लिमिटेड (केयूकेएल) को अभिभावक भएकाले केयूकेएललाई सहज रूपमा पानी वितरण गर्ने कार्यमा मन्त्रालयले पूर्ण साथ र सहयोग गर्दै आएको तथा आगामी दिनमा पनि सम्पूर्ण सहयोग गर्ने मन्त्री यादवको भनाइ थियो ।

काठमाडौँ उपत्यकासहित देशभरिका खानेपानीका समस्या समाधानका लागि मन्त्रालयले कदम चालिरहेको समेत उनले बताए । यसैगरी मन्त्री यादवले प्रमुख कार्यकारी अधिकृत (सीईओ) तथा केयूकेएल कर्मचारी ट्रेड युनियनबीच आपसी मेलमिलापमा रही नागरिकलाई खानेपानी पुर्‍याउने कार्यलाई निरन्तरता दिनसमेत आग्रह गरेका थिए ।

उक्त बैठकमा मन्त्रालयकी सचिव ई. प्रमिलादेवी शाक्य बज्राचार्यले काठमाडौँ उपत्यका खानेपानी लिमिटेड (केयूकेएल) ले यहाँका नागरिकलाई खानेपानी वितरणको कार्य गर्दै आइरहेको र अबका दिनमा पनि उक्त कार्यलाई थप अघि बढाउँदै पानी लिकेज भएका ठाउँमा चाडो मर्मत गर्नुपर्ने धारणा राखिन् ।

उनले भनिन्, ‘केयूकेएलले विपद्को समयमा पनि काठमाडौँ उपत्यकावासीलाई पानी पुर्‍याउन सफल भएको उदाहरण हामीमाझ छ, कतिपय ठाउँमा पानी लिकेज भएर पानी खेर गइरहेको छ, त्यसको रोकथामसहित खानेपानीका मिटर नपाएको गुनासो पनि छ, यसको समस्या चाँडो समाधान गर्नतर्फ ध्यान दिन जरूरी छ ।’

केयूकेएलका प्रमुख कार्यकारी अधिकृत अशोककुमार पौडेलले काठमाडौँ उपत्यकामा खानेपानी वितरणलगायतका विभिन्न काम भइरहेका र गत असोज ११ गतेको बाढीका कारण कतिपय ठाउँका खानेपानीका मुहान बाढीले बगाएकाले समस्या उत्पन्न भएको बताए । आजको उक्त बैठकमा मन्त्रालयका सहसचिव ई. मिना श्रेष्ठ, ई. रमाकान्त दुवाडीलगायत केयूकेएल कर्मचारी ट्रेड युनियनका कर्मचारीको सहभागिता थियो ।