मोबाइल व्यवसायी महासंघको दोस्रो महाधिवेशन सञ्चारमन्त्री शर्माले उद्घाटन गर्ने

काठमाडौं । नेपाल मोबाइल व्यवसायी महासंघले दोस्रो महाधिवेशन तथा तेस्रो साधारण सभा यही जेठ २५ गते आयोजना गर्ने भएको छ ।

आज बिहीबार रिपोर्टर्स क्लब नेपालमा पत्रकार सम्मेलन गरी जेठ २५ गते काठमाडौंको चाबहिलस्थित स्मार्ट प्यालेस एण्ट इभेण्ट्समा दोस्रो महाधिवेशन तथा तेस्रो साधारण सभा आयोजना गर्ने जानकारी दिएको हो ।

दोस्रो महाधिवेशन तथा तेस्रो साधारण सभाको उद्घाटन सञ्चार तथा सूचना प्रविधिमन्त्री रेखा शर्माले गर्ने महासंघका महासचिव रमेश घिमिरेले जानकारी दिए । महाधिवेशनमा नेपालभरबाट करिब एक हजारभन्दा बढी व्यवसायी सहभागी रहने उनको भनाइ छ ।

महाधिवेशनले अध्यक्षसहित वरिष्ठ उपाध्यक्ष, उपाध्यक्ष ७, महासचिव, सचिव २, कोषाध्यक्ष, सहकोषाध्यक्ष गरी १४ जना पदाधिकारी र वरिष्ठ सदस्य एक जना र ३४ जना केन्द्रीय सदस्य चयन गर्ने उनले बताए ।

महासंघका केन्द्रीय अध्यक्ष भरत भट्टराईले मोबाइल व्यवसायमा लगानीपछिको नाफा घट्दो अवस्थामा रहेको बताए । उनले अहिले महँगो रेटका मोबाइल सेट ग्राहकको रोजाइमा परिरहेको भएपनि भन्सार छलीका मोबाइल भित्रिँदा व्यवसायीहरू मारमा परेको बताए ।

उनले वार्षिक एक अर्ब ८० करोड रूपैयाँ बराबरको मोबाइल सेट नेपालमा विदेश भ्रमणमा जाँदा र आफन्तहरूले विदेशबाट पठाउँदा आइरहेको बताए । त्यस्तै, खुल्ला सीमानबाट राजश्व छली गरेर प्रति महिना पाँच हजार पाँच सयका दरले नेपालमा आइरहेको महासंघको तथ्याङ्क छ । राज्यले भन्सार छलीबाट आउने यस्ता प्रकारका मोबाइल सेटहरूमा प्रतिबन्ध लगाउनुपर्ने महासंघको माग छ ।

यस किसिमका कारोबारको अन्त्य गर्न सरकारले तत्काल एमडीएमएस प्रणाली लागू गर्नुपर्ने उनको भनाइ छ । साथै, सेकेण्ड ह्यान्ड मोबाइलको कारोबारमा सरकारको नीति प्रष्ट हुन आवश्यक रहेको उनले बताए । नीति स्पष्ट नहुँदा व्यवसायीहरू मारमा परेको उनले बताए ।