कांग्रेस सांसद बस्नेतको पद स्वतः निलम्बन, सभामुखले के गर्लान् ?

काठमाडौं । प्रतिनिधिसभा सांसद मोहनबहादुर बस्नेतको पद स्वतः निलम्बन भएको छ ।

भ्रष्टाचार मुद्दा दर्ता भएसँगै नेपाली कांग्रेसका नेता बस्नेतको सांसद पद स्वतः निलम्बन भएको हो ।

सिन्धुपाल्चोक–२ बाट निर्वाचित सांसद बस्नेतविरुद्ध अख्तिायर दुरुपयोग अनुसन्धान आयोगले बिहीबार विशेष अदालतमा भ्रष्टाचार मुद्दा दायर गरेको छ । टेरामक्स खरिदमा भ्रष्टाचार गरेकाे ठहर गर्दै आयोगले उनीसहित १६ व्यक्ति र दुई कम्पनीविरुद्ध मुद्दा दायर गरेको हो ।

प्रचलित भ्रष्टाचार निवारण ऐनको दफा ३३ मा भ्रष्टाचार मुद्दा दायर भएसँगै सांसद पद निलम्बन हुने व्यवस्था छ । बस्नेत अब सङ्घीय संसद् र यसअन्तर्गतका समितिहरूका बैठकमा सहभागी हुन पाउने छैनन् । उनको तलबभत्ता पनि रोकिनेछ ।

यद्यपि, सांसद पद निलम्बनको सूचना सभामुखले संसद्मा सुनाउनुपर्ने व्यवस्था छ । हालका सभामुख देवराज घिमिरेको कामको इतिहास हेर्दा भने बस्नेतको पद अहिल्यै निलम्बन हुन्छ वा हुँदैन भन्नेमा शङ्का छ ।

यसअघि नेकपा (एमाले) का सांसद टोपबहादुर रायमाझीविरुद्ध नक्कली भुटानी शरणार्थी प्रकरणमा मुद्दा दर्ता भइसकेपछि पनि सभामुख घिमिरेले उनको पद निलम्बन गरेका थिएनन् । सांसदलाई अदालतले पुर्पक्षका लागि थुनामा पठाएमा मात्र पद निलम्बन हुने प्रतिनिधिसभाको नियमावलीमा टेकेर उनले रायमाझीको पद निलम्बन गरेका थिएनन् ।

रायमाझीलाई अदालतले थुनामा पठाउने आदेश दिइसकेपछि मात्र सभामुख घिमिरेले उनको पद निलम्बन गरेका थिए । तर, राष्ट्रिय स्वतन्त्र पार्टीका सांसद रवि लामिछानेको हकमा भने उनले मुद्दा दर्ता हुनेबित्तिकै पद निलम्बन गर्ने निर्णय गरेका थिए ।