मुस्ताङ–डोल्पा सीमाबाट करिब १० लाख पर्ने मोटरसाइकल बरामद

पोखरा । चीनबाट चोरेर ल्याएका ४ वटा चिनियाँ मोटरसाइकल मुस्ताङ र डोल्पाको सीमाबाट बरामद भएको छ ।

वारागुङ मुक्तिक्षेत्र गाउँपालिका ५ फल्याक स्थित साङता हुँदै डोल्पा जाने सडकबाट ती मोटरसाइकल बरामद भएका मुस्ताङ प्रहरी प्रमुख डीएसपी भोज पाण्डेले जानकारी दिए ।

उनका अनुसार चारवटै मोटरसाइकल चीनबाट भन्सार छलेर ल्याइएको हो । ‘मुस्ताङबाट डोल्पा सप्लाई गर्न लागेको सूचना पाएपछि प्रहरीले बरामद गरेको हो,’ उनले भने ।

प्रहरी सहायक निरीक्षक सुजन गुरुङको कमान्डमा गएको ५ जनाको टोलीले मोटरसाइकल बरामद गरेको पाण्डेले बताए ।

ती मोटरसाइकलको मूल्य करिब १० लाख पर्ने अनुमान गरिएको छ । मोटरसाइकल सबै मुस्ताङ भन्सार कार्यालय पठाइएको छ । त्यस क्षेत्रबाट मोटरसाइकल चोरी निकासी बढेको सूचना आइरहेको पाण्डेले सुनाए ।