नासाको चन्द्रमा अभियान आर्टेमिस- २ को प्रक्षेपण अन्तिम चरणमा

काठमाडौँ । करिब आधा शताब्दीपछि मानव फेरि चन्द्रमातर्फ फर्किने तयारीमा पुगेको छ । अमेरिकी अन्तरिक्ष संस्था नासाको आर्टेमिस- २ अभियान अहिले अन्तिम चरणमा पुगेको छ र प्रक्षेपण नजिकिएको जनाइएको छ ।

यस अभियानअन्तर्गत चार अन्तरिक्षयात्रीलाई करिब पाँच लाख माइलभन्दा बढी दूरीको यात्रामा पठाइनेछ । प्रक्षेपणका लागि स्पेस लन्च प्रणाली र ओरायन अन्तरिक्ष यानलाई पुनः प्रक्षेपण स्थल ३९बी मा स्थापना गरिएको छ । अप्रिलको शुरुमै प्रक्षेपण हुने सम्भावना रहेको छ ।

नासाका अनुसार यो १० दिनको यात्रा केवल चन्द्रमाको परिक्रमा मात्र नभई भविष्यमा मानव अवतरण र स्थायी आधार स्थापना गर्ने दिशामा महत्वपूर्ण कदम मानिएको छ । तर यो अभियान जोखिमपूर्ण पनि मानिएको छ, किनकि यसअघि मानवसहित प्रयोग नभएको यानमा पहिलो पटक अन्तरिक्षयात्री पठाइँदैछ । प्राविधिक समस्याका कारण मार्चमा स्थगित भएको यो अभियान अहिले अन्तिम परीक्षणपछि तयारी अवस्थामा पुगेको हो ।

यस अभियानमा कमाण्डर रीड वाइजम्यान, पाइलट भिक्टर ग्लोभर, क्रिस्टिना कोच र क्यानडाका जेरेमी ह्यान्सन सहभागी हुदैछन् । तीन अमेरिकी र एक क्यानडेली गरी चार सदस्यीय टोलीले दुई वर्षभन्दा बढी समय तालिम लिएका छन् । तीमध्ये तीन जनाले यसअघि अन्तरिक्ष यात्रा गरिसकेका छन् भने ह्यान्सन पहिलो पटक उडानमा सहभागी हुँदैछन् ।

अभियानको सबैभन्दा संवेदनशील क्षण चन्द्रमाको पछाडिको भागमा पुग्दा आउनेछ, जहाँ ३० देखि ५० मिनेटसम्म पृथ्वीसँग सम्पर्क विच्छेद हुनेछ । पृथ्वीमा फर्किँदा यानले अत्यन्त उच्च गतिमा वायुमण्डलमा प्रवेश गर्नेछ र अत्यधिक तापक्रम सहनुपर्नेछ ।

पूरा यात्राका क्रममा अन्तरिक्षयात्रीहरू ओरायन क्याप्सुलभित्र बस्नेछन्, जसको आकार सीमित रहेको छ । त्यही सानो स्थानमा उनीहरूले काम, खानपिन, आराम र व्यायाम गर्नुपर्नेछ । क्याप्सुलमा जीवन सहायक प्रणाली, पानी, खाद्यान्न र अन्य आवश्यक उपकरणको व्यवस्था गरिएको छ ।