‘भी-एक्स्पो’ एकैपटक लाखौँ व्यवसायीमाझ पुग्ने एकमात्र माध्यम हो

नेपाल उद्योग वाणिज्य संघ काठमाडौंले यही वैशाख १४ गतेदेखि आगामी जेठ १३ गतेसम्म ‘डिजिटल बजारमार्फत नेपाली उत्पादनको विश्वव्यापीकरण’ नाराका साथ ‘एनसीआईसीके भर्चुअल एक्स्पो, २०२४’ आयोजना गर्दैछ ।

‘एनसीआईसीके डिजिटल एक्स्पो, २०२४’ को नामले समेत तीव्र प्रचारप्रसार भइरहेको सो मेला आजदेखि सुरू हुँदैछ । संघीय सरकारको प्रवक्ता समेत रहनुभएकी सञ्चार तथा सूचना प्रविधिमन्त्री रेखा शर्माले काठमाडौंको जमलस्थित होटेल एल्लो प्यागोडामा आयोजना गरिने विशेष कार्यक्रममार्फत मेला उद्घाटन गर्ने कार्यक्रम छ ।

विभिन्न खालका प्रदर्शनीहरूमध्ये पृथक शैली अपनाएको यो मेलाले विशेष महत्व राख्ने अपेक्षा गरिएको छ भने मुलुकको शिथिलतायुक्त अर्थतन्त्रलाई चलायमान बनाउने विश्वास समेत गरिएको छ । किनभने यो मेला देशभरका उद्योग–व्यवसाय र उद्योगी–व्यवसायीमाझ एकसाथ पुग्ने छ । त्यसका लागि उद्योग वाणिज्य संघ काठमाडौंले मेलालाई भर्चुअल माध्यमबाट सञ्चालन गर्दैछ ।

नेपालमा डिजिटल युग सुरू भएको पनि करिब २५ वर्ष नाघिसकेको छ । मर्कन्टाइलको च्याटबाट सुरू भएको नेपालीहरूको डिजिटल युग कम्प्युटरमा फ्लपी, सीडी र हार्डडिस्क हुँदै चिप र क्लाउड स्टोरसम्म आइपुगेको छ भने टेक्नोलोजी र अब चल्ने पेपरलेस टेक्नोलोजीले ठूलै मार्केट जमाइसकेको अवस्था छ । संसारभर गरिने जुनसुकै प्रकारका प्रदर्शनीहरू पनि अब भर्चुअल माध्यममार्फत गरिन थालिसकेको छ । त्यसकारण यो २१औँ सताब्धीलाई डिजिटल युग हो भन्दा फरक नपर्ला ।

अबका सबैखाले बजारीकरण सोसल मिडिया अर्थात् सामाजिक सञ्जालबाट सुरू भइसकेको छ भने टेक्नोलोजीकै कारण विश्व नै एउटा सानो गाउँको रूपमा खुम्चिन थालेको छ । यी यावत विषयको प्रभावबाट नेपाल पनि अछुतो छैन । ढिलोचाँडो यहाँ पनि टेक्नोलोजीको प्रयोग र विस्तार ह्वात्तै बढिरहेको छ । विभिन्न ब्राण्डका दर्जनौँ पेमेन्ट गेट–वे र फिनटेक प्रणालीहरूले हाम्रो कार्यशैली नै बदलिसकेको स्थिति छ । ई–सेवा, खल्ती, नेपाल–पेजस्ता दर्जनौँ पेमेन्ट गेट–वेहरूले बजारमा पकड जमाउनका साथै हाम्रो दैनिक व्यस्ततालाई समेत सहज बनाइरहेको छ ।

दराजलगायतका मोबाइल एप्लिकेशनहरूले नेपालमा आयातित वस्तु तथा सेवाहरूको राम्रो बजारीकरण गरिरहेको छ । यी सबै प्रभावकारितालाई आत्मसाथ गर्दै नेपाल उद्योग वाणिज्य संघ काठमाडौंले पनि नेपालमा भर्चुअल मेला (भी–एक्स्पो’ आयोजना गर्ने निर्णय लिएको हो । हामीले विदेशी ब्राण्ड मात्र होइन स्वदेशी उत्पादनलाई बढी भन्दा बढी नेपाली उपभोक्तामाझ जोड्न जरुरी छ । नेपालली उत्पादनलाई देश र विदेशमा जोड्नलाई पनि यस किसिमको एक्स्पोले भरपुर सहयोग पुर्याउने छ ।

स्वदेशी वस्तु तथा सेवाको प्रदर्शनी गर्ने मात्र नभइ यो मेलाले मुलुकको विद्यमान आर्थिक अवस्था सुधारको उपायहरू पनि खोज्ने छ । यसका लागि लाखौँ व्यवसायमाझ पुग्नुपर्ने हुन्छ । त्यसै कारणले गर्दा सजिलो उपायका रूपमा उद्योग वाणिज्य संघ काठमाडौंले भर्चुअल प्लेटफर्मलाई उपयुक्त ठानेको हो । यसरी मेला आयोजना गर्दा टाढा–टाढादेखि मानिसहरू धाएर मेला अवलोकन गर्न आउनुपर्ने सबै प्रकारको बाध्यता र दुःख अन्त्य हुनेछ । फलस्वरूप आ–आफ्नो ग्याजेटहरू जस्तैः मोबाइल फोन, ल्यापटप, कम्प्युटर र ट्याबलगायत उपकरणहरूमार्फत जहाँ हा त्यहीँ बसेर मेला अवलोक गर्नाका साथै वस्तु तथा सेवा उपभोग गर्न समेत पाउने अवस्था सृजना गरिएको छ । त्यसैले ‘भी–एक्स्पो’ आयोजना गरिएको हो ।

यो एक्स्पोले नेपाली वस्तु तथा सेवाको बजार प्रवर्द्धनका लागि ठूलो टेवा पुर्याउने विश्वास आयोजकले गरेको छ । देशभित्रका उत्पादनलाई विशेष प्राथमिकता दिँदै विदेशका समेत विभिन्न प्रडक्टहरू यो मेलामा समावेश गरिएको छ । यसले विभिन्न किसिमबाट व्यवसाय गरिरहेका र व्यवसाय गर्न चाहने व्यवसायीहरूबीच कुराकानी तथा वस्तु पहिचानको अवसर प्राप्त हुनेछ । यो एक्स्पोमा देशमा रहेका मात्र होइन विदेशमा रहेका व्यवसायीहरू समेत सजिलै समेटिने भएकाले यसको महत्व अझ प्रभावकारी हुनेछ भन्ने विश्वास गरिएको छ ।

एक्स्पोका उद्देश्य के–के छन् ?

– सानादेखि ठूला उद्योगी व्यवसायीहरूलाई एउटै प्लेटफर्ममा समेट्नु ।
– नेपाली उत्पादनहरूको सरल र सहज बजारीकरण गर्न मद्दत गर्नु ।
– नेपाली उत्पादनहरूको ब्राण्ड भ्यालु क्रेट गर्न मद्दत गर्नु ।
– व्यवसायीहरूको कुरा सुनेर व्यवसायमा रहेका समस्याहरूको पहिचान गर्नु ।

(शाह नेपाल उद्योग वाणिज्य संघ काठमाडौंको सदस्य तथा प्रदर्शनी तथा प्रकाशन समितिको सभापति हुन् ।)