नेपाल एयरलाइन्सले आजदेखि साँफेबगरबाट उडान भर्ने

अछाम । नेपाल वायु सेवा निगम (नेपाल एयरलाइन्स)ले आज (मंगलबार)बाट अछामको साँफेबगर विमानस्थलमा उडान भर्ने भएको छ । निगमले मंगलबार दुईवटा उडान भर्न लागेको हो ।

निगमका उपर्निदेशक रमेश पौडेलका अनुसार पहिलो उडान बिहान १० बजे धनगढीदेखि साँफेबगर र साँफेबगरबाट १०ः४५ बजे धनगढीका लागि उडान हुनेछ । दोस्रो उडान धनगढीबाट फेरि ११ः ३० बजेका लागि तय भएको र साँफेबगरबाट १२ः १५ बजे धनगढीका लागि उडान छ ।

धनगढीबाट अछाम र अछामबाट धनगढीका लागि ३७ सय ८५ कायम गरिएको छ । नेपालमा कोरोना महामारीका कारण गरिएको लकडाउनले उडान बन्द गरेको थियो ।