त्रिकोणात्मक टी–२० सिरिजमा आज नेपाल र नेदरल्याण्ड्स भिड्दै

काठमाडौं । नेपालले स्कटल्याण्ड र नेदरल्याण्ड्स सम्मिलित त्रिकोणात्मक टी–२० सिरिजअन्तर्गत आज नेदरल्याण्ड्सको सामना गर्दै छ । यो खेल नेपाली समय अनुसार साँझ ७:४५ बजेदेखि सुरू हुने छ ।

नेपाल र नेदरल्याण्ड्सबीचको पछिल्लो खेल ऐतिहासिक बनेको थियो । सो खेलको निर्णय तेस्रो सुपर ओभरमा भएको थियो, जुन टी–२० अन्तर्राष्ट्रिय क्रिकेटमा यसअघि भएको थिएन । सो खेल नेदरल्याण्ड्सले जितेको थियो ।

यस सिरिजमा नेदरल्याण्ड्स ३ खेलमा २ जित र एक हारसहित ४ अङ्क हासिल गर्दै शीर्ष स्थानमा छ । त्यस्तै, स्कटल्याण्डले ३ खेलमा एक जित र २ हार बेहोरेको छ भने नेपालले २ खेलमा एक जित र एक हार बेहोरेको छ ।

नेपाल र नेदरल्याण्ड्स अहिलेसम्म टी–२० खेलमा १४ पटक आमनेसामने भएका छन्, जसमा नेदरल्याण्ड्स ८ खेलमा विजयी भएको छ भने नेपालले ५ खेल जितेको छ । आईसीसीको टी–२० वरीयतामा नेपाल १८औँ स्थानमा छ भने नेदरल्याण्ड्स १४औँ स्थानमा छ ।

२० जुनसम्म हुने त्रिकोणात्मक टी–२० सिरिजमा शुक्रबार नेपाल र स्कटल्याण्ड खेल्ने तालिका छ ।

यस सिरिजमा खेल्ने नेपाली टिममा रोहित पौडेल (कप्तान), दीपेन्द्रसिंह ऐरी (उपकप्तान) कुशल भुर्तेल, आसिफ शेख (विकेट किपर), अनिल साह, भीम सार्की, आरिफ शेख, बसिर अहमद, नन्दन यादव, रिजन ढकाल, ललित राजवंशी, सन्दीप लामिछाने, करण केसी, किरणकुमार ठगुन्ना, रूपेश सिंह र लोकेश बम छन् ।