नेपाल लाइफ इन्स्योरेन्सलाई ‘लाइफ इन्स्याेरेन्स अफ द इयर अवार्ड’ (भिडिओ)

काठमाडौं । अग्रणी जीवन बीमा कम्पनी नेपाल लाइफ इन्स्योरेन्स लिमिटेडले ‘लाइफ इन्स्योरेन्स अफ द इयर अवार्ड, २०२५’ प्राप्त गरेको छ ।

कर्पोरेट म्यागजिनले कम्पनीलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा कम्पनीलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले नायब प्रमुख कार्यकारी अधिकृत (डीसीईओ) अमितकुमार केयललाई अवार्ड प्रदान गर्नुभएको थियो ।

नेपाल लाइफ इन्स्योरेन्सबारे

नेपाल लाइफ इन्स्योरेन्स कम्पनी लिमिटेड (एनएलआईसी) नेपालको अग्रणी जीवन बीमा कम्पनी हो । २०५८ वैशाख २१ मा पब्लिक लिमिटेड कम्पनीको रूपमा यसको स्थापना भएको हो । नेपालले अवलम्बन गरेको आर्थिक उदारीकरण नीतिसँगै आमनेपाली जीवनको सुरक्षा र सृमद्धिको चाहनालाई परिपूर्ति गर्ने उद्देश्यले निजी क्षेत्रका ख्यातिप्राप्त औद्योगिक तथा व्यापारिक घरानाहरूको समूहले यो कम्पनी स्थापना गरेको हो ।

गोविन्दलाल सङ्घाईको अध्यक्षतामा सञ्चालित नेपाल लाइफ इन्स्योरेन्समा प्रवीणरमण पराजुली प्रमुख कार्यकारी अधिकृत (सीईओ) हुनुहुन्छ । ‘नेपाल लाइफ, किनकि जीवन अमूल्य छ’ नाराका साथ सञ्चालित कम्पनीले देशभर रहेका आफ्ना शाखा कार्यालयहरूमार्फत ग्राहकमैत्री सेवा प्रदान गर्दै आएको छ ।

जीवन बीमा एक दीर्घकालीन प्रकृतिको व्यवसाय रहेको तथ्यलाई हृदयङ्गम गर्दै कम्पनीले पारदर्शिता र जवाफदेहितालाई पहिलो प्राथमिकतामा राख्दै आएको छ । चुस्त आन्तरिक नियन्त्रण प्रणाली तथा संस्थागत सुशासनको माध्यमबाट कम्पनीले सफलताको १६औँ वर्ष पार गरी जीवन बीमा व्यवसायको क्षेत्रमा आफूलाई एक अग्रणी कम्पनीको रूपमा निरन्तर उभ्याउन सफल रहँदै आएको छ ।

नेपाल लाइफले जर्मनीस्थित विश्वको ख्यातिप्राप्त पुर्नबीमा कम्पनी ह्यानओभर रि–इन्स्योरेन्स कम्पनीसँग पुनर्बीमा गरेको छ । कम्पनीले आमजनताको सुरक्षा र समृद्धिको चाहनालाई ध्यानमा राख्दै फरक–फरक बीमा योजनाहरू कार्यान्वयनमा ल्याएको छ । ग्राहकहरूको सुविधाका लागि कम्पनीले बीमा प्रिमियम गणक, आवश्यकता मूल्याङ्कन गणक, कर गणकजस्ता डिजिटल उपकरणहरू उपलब्ध गराएको छ, जसले वित्तीय योजना बनाउन मद्दत गर्दछ । आफ्नो स्थापनादेखि नै नेपाली समाजमा जीवन बीमाको महत्व उजागर गर्दै विश्वसनीय र उत्कृष्ट सेवाका साथ अग्रणी स्थान हासिल गरी ग्राहकहरूको विश्वास जितेको छ ।

हेर्नहोस् भिडिओ–