नेपालका राजावादीलाई भारतको सत्तारूढ बीजेपीको साथ

नेपालमा राजावादीहरूले गरिरहेको आन्दोलनलाई मुख्यतः राजसंस्था पुनर्स्थापनाका पक्षमा रहेको अर्थ्याइए पनि यसको माग हिन्दुराष्ट्र पुनर्स्थापनाको पनि हो । त्यसो हुँदा भारत आफ्नो चाहनालाई नेपालका राजावादीहरूले मात्र पूरा गर्न सक्छन् भन्ने ठान्छ । त्यसैले पनि सत्तारूढ बीजेपी नेपालमा राजसंस्था पुनर्स्थापनाको पक्षमा देखिएको हो ।

काठमाडौं । गत फागुन २५ गते पोखराबाट काठमाडौं फर्किएका पूर्वराजा ज्ञानेन्द्र शाहको स्वागतमा देखिएको राजसंस्था पक्षधरहरूको व्यापक उपस्थितिले नेपालमा राजसंस्था पुनर्स्थापनाको माहोल बलियो बनाएको छ ।

त्यही माहोलबाट उत्साहित भएका राजावादीहरूले भोलि (शुक्रबार) सङ्घीय राजधानी काठमाडौंको तीनकुनेमा ठूलो सङ्ख्यामा समर्थकहरू उतारेर आन्दोलन गर्न लागेका छन् । राजसंस्था पुनर्स्थापनाका लागि गठित संयुक्त जनआन्दोलन समितिले यो आन्दोलन गर्न लागेको हो, जसको नेतृत्व गर्ने जिम्मा चर्चित मेडिकल व्यवसायीसमेत रहेका दुर्गा प्रसाईंलाई दिइएको छ । प्रसाईं राष्ट्र, राष्ट्रियता, धर्म, संस्कृति तथा नागरिक बचाउ महाअभियानका नेतृत्वकर्तासमेत हुन् ।

स्मरण रहोस्, भोलि नै गणतन्त्रवादीहरूले पनि यसको प्रतिकारस्वरूप राजधानीकै भृकुटीमण्डपमा प्रदर्शन गर्दै छन् । परिवर्तित व्यवस्था उल्टाउन र विद्यमान व्यवस्था जोगाउन हुन लागेको यो आन्दोलनमा बाह्य देशहरूको पनि राम्रै नजर छ ।

नेपालमा जब–जब राजनीतिक उथलपुथल हुन्छ वा हुने सङ्केत देखिन्छ, तब–तब दक्षिणी छिमेकी राष्ट्र भारतको प्रत्यक्ष–परोक्ष संलग्नता रहने गरेको जगजाहेर छ । भारतमा अहिले भारतीय जनता पार्टी (बीजेपी) को सत्ता छ । यो हिन्दुत्ववादी पार्टी हो । हिन्दुत्वको विकास, विस्तार र संरक्षण गर्दै देशलाई द्रुत अग्रगमनतर्फ लैजानु नै उसको मुख्य एजेण्डा हो । हिन्दुहरूको बाहुल्यता रहेको भारतमा बीजेपीले समातेको हिन्दुत्ववादी मुद्दाकै कारण त्यहाँका जनताले उसलाई लगातार सत्ताको नेतृत्व सुम्पिरहेका हुन् । भारत हिन्दुराष्ट्र त होइन तर त्यहाँ बहुसङ्ख्यक हिन्दु छन् ।

यता, कुनैबेला हिन्दुराष्ट्र रहेको नेपाल अहिले धर्मनिरपेक्ष राष्ट्र हो । यद्यपि, अहिले पनि यहाँ हिन्दुहरूकै बाहुल्यता रहेको तथ्यलाई अस्वीकार गर्न सकिँदैन । त्यसैले नेपालमा हिन्दुराष्ट्र पुनर्स्थापना हुनुपर्छ भन्नेहरूको सङ्ख्या पनि ठूलै छ । साथै, भारतले पनि नेपालमा हिन्दुराष्ट्र पुनर्स्थापना होस् भन्ने चाहना राखेको पाइन्छ ।

नेपालमा राजावादीहरूले गरिरहेको आन्दोलनलाई मुख्यतः राजसंस्था पुनर्स्थापनाका पक्षमा रहेको अर्थ्याइए पनि यसको माग हिन्दुराष्ट्र पुनर्स्थापनाको पनि हो । त्यसो हुँदा भारत आफ्नो चाहनालाई नेपालका राजावादीहरूले मात्र पूरा गर्न सक्छन् भन्ने ठान्छ । त्यसैले पनि सत्तारूढ बीजेपी नेपालमा राजसंस्था पुनर्स्थापनाको पक्षमा देखिएको हो ।

स्मरणीय छ, पूर्वराजा ज्ञानेन्द्र शाहले गत जनवरीमा उत्तर प्रदेशको भ्रमणमा गएका बेला त्यहाँका मुख्यमन्त्री योगी आदित्यनाथसँग भेटेका थिए । उत्तर प्रदेशको भ्रमणबाट फर्किएको केही समयपछि नेपालमा राजसंस्था पक्षधरहरू सडक आन्दोलनमा आउनु र फागुन २५ मा पूर्वराजा ज्ञानेन्द्र शाहको स्वागतका नाममा भएको प्रदर्शनमा मुख्यमन्त्री योगी आदित्यनाथको तस्बिरअङ्कित पोस्टर प्रयोग हुनुले भारत नेपालमा राजसंस्था चाहन्छ भन्ने विषयलाई थप बल पुर्‍याउँछ ।

किनकि, योगी आदित्यनाथ नेपालमा राजसंस्थाको समर्थन गर्ने कट्टर हिन्दुवादी भारतीय नेता हुन् । उनलाई भारतमा प्रधानमन्त्री नरेन्द्र मोदीपछि सबैभन्दा प्रभावशाली बीजेपी नेता मानिन्छ । साथै, पार्टीभित्र र बाहिर उनलाई मोदीपछि बीजेपीको सम्भावित उत्तराधिकारीका रूपमा समेत हेरिन्छ । नेपालसँग ‘रोटी–बेटी’को सम्बन्ध रहेको भनिने तथा निकट भविष्यमा विश्वको तेस्रो शक्तिराष्ट्र बन्ने दौडमा रहेको भारतका यति प्रभावशाली नेताको तस्बिर राजसंस्था पुनर्स्थापनाको पक्षमा प्रयोग हुनुले नेपालमा हिन्दुराष्ट्र र राजसंस्थाको पुनरोदयकाे प्रयासमा भारत सक्रिय छ भन्ने बलियाे सन्देश प्रवाहित गरेको छ ।

वास्तवमा, योगी आदित्यनाथ नेपाल धर्मनिरपेक्ष राष्ट्र बनेदेखि नै खुसी थिएनन् । सन् २००६ मा उत्तर प्रदेश सरकारको नेपाल नीतिबारे सोधिएको प्रश्नमा उनले नेपालमा शान्ति र स्थिरता राजतन्त्रबाट मात्रै सम्भव रहेको भन्दै यो व्यवस्था आवश्यक हुने बताएका थिए ।

यी समाचारहरू पनि पढ्नुहाेस्