इटालियन राजदूतद्वारा नेपाल–इटाली उद्योगवाणिज्य संघका अध्यक्ष अग्रवालसँग भेटवार्ता

काठमाडौं । नव नियुक्त इटालियन राजदूत महामहिम एन्तोनियो बार्तोलीले नेपाल–इटाली वाणिज्य तथा उद्योग संघका अध्यक्ष श्री संजय अग्रवालसँग भेटवार्ता गर्दै दुई देशबीच व्यापार, लगानी, पर्यटन, तथा विकासलाई प्रवद्र्धन गर्ने सम्भावनाहरूको बारेमा छलफल गरेका छन्।

बैठकमा सम्माननीय व्यक्तित्वहरूमा कोलकत्ताका लागि इटालीका मानार्थ महावाणिज्यदूत श्री रिकार्डो डाल्ला कोस्टा, नेपाल–इटाली वाणिज्य तथा उद्योग संघका मानार्थ संरक्षक श्री राजेश काजी श्रेष्ठ, नेपालका लागि इटालीकी मानार्थ महावाणिज्यदूत सुश्री प्रतिमा राणा पाँडे तथा नेपाल–इटाली वाणिज्य तथा उद्योग संघका बोर्ड सदस्यहरूको उपस्थिति रहेको थियो। बैठकले नेपाल र इटालीबीच आर्थिक तथा सांस्कृतिक सम्बन्धलाई सुदृढ गर्ने अवसरहरूको खोजी गर्न महत्वपूर्ण मञ्चको रूपमा भूमिका निर्वाह गर्यो।

छलफलको मुख्य विषयहरूमा  द्विपक्षीय व्यापार प्रवद्र्धन, व्यवसायिक सञ्जाल विस्तार, तथा प्रमुख क्षेत्रहरूमा लगानी अभिवृद्धि गर्ने थिए। महामहिम राजदूत एन्तोनियो बार्तोलीले पर्यटन, पूर्वाधार, तथा प्रविधि क्षेत्रमा नेपालसँगको आर्थिक सहकार्यलाई अझ सशक्त बनाउने इटाली सरकारको प्रतिबद्धता व्यक्त गरे। नेपाल–इटाली वाणिज्य तथा उद्योग संघका अध्यक्ष संजय अग्रवालले नेपाल र इटालीबीच व्यापारिक समुदायलाई जोड्ने तथा पारस्परिक लाभदायक साझेदारीहरू प्रवद्र्धन गर्ने संस्थाको भूमिकालाई पुनः पुष्टि गरे।

बैठक नेपाल र इटालीबीचको सम्बन्धलाई आगामी वर्षहरूमा रणनीतिक पहलहरू तथा सहकार्य पूर्ण कार्यक्रमहरू मार्फत थप सुदृढ गर्ने साझा प्रतिबद्धताका साथ सम्पन्न भयो।