मधेस कृषि विश्वविद्यालयका उपकुलपति र रजिष्ट्रारलाई पदबाट निलम्बन

जनकपुरधाम । मधेश कृषि विश्वविद्यालयका उपकुलपति र रजिस्ट्रारलाई बर्खास्त गर्ने निर्णय भएको छ । मंगलबार जनकपुरधाममा भएको विश्वविद्यालयको सभाबाट उपकुलपति डा.वैजनाथ महतो र रजिष्ट्रार श्रीभगवान ठाकुरलाई बर्खास्त गर्ने निर्णय भएको हो ।

नीति तथा योजना आयोगका उपाध्यक्ष डा.सोहनप्रसाद साहको नेतृत्वमा गठित तीन सदस्य समितिले ७ असोजमा बुझाइएको प्रतिवेदनको आधारमा दुवैजना विश्वविद्यालयको अनाधिकृत गतिविधिमा संलग्न रहेको पाइएकाले विश्वविद्यालय सभाले दुवै जनालाई बर्खास्त गर्ने निर्णय भएको एक सदस्यले बताए ।

दिउँसो १२ बजेदेखि जनकपुरको एक होटेलमा चलेको विश्वविद्यालय सभा राति ११ बजेसम्म चलेको थियो । सभामा विश्व विद्यालयका कुलपति समेत रहेका मुख्यमन्त्री सतिशकुमार सिंह, सहकुलपति शिक्षा तथा संस्कृतिमन्त्री रानी शर्मा तिवारीलगायत विश्व विद्यालय सभाका पदाधिकारी तथा सदस्यहरु सहभागी थिए ।

चालु आर्थिक वर्ष २०८१/०८२ को नीति तथा कार्यक्रम समेत सभाबाट पास भएको छ ।

यसअघि १६ पुसमा जनकपुरमा भएको विश्व विद्यालयको सभामा समेत उपकुलपति महतो र राजिष्ट्रार ठाकुरलाई बाहिर निकालिको थियो ।

जसपा नेपाल र जनमतबीचको विवादको भुमरीमा मधेश कृषि विश्व विद्यालय फँसेको छ । ८ माघ २०८० मा विश्वविद्यालयको भवन शिलान्यासको विषयमा जसपा र जनमतबीच भएको विवाद भएको थियो ।

लामो समयदेखि सभा नहुँदा विश्वविद्यालयमा आर्थिक कारोबार ठप्प रहेको छ । जसको कारण विश्वविद्यालयका पदाधिकारी र कर्मचारीले तलबभत्ता खान पाएका छैनन् । सेवा प्रदायकहरूले बक्यौता रकम नपाउँदा शैक्षिक सामग्री, इन्धन, विद्युत्, पानी, सञ्चार सेवामा अवरोध छ । त्यहाँ अध्ययनरत्त कृषि विज्ञानका दुई सेमेस्टरका सयजना विद्यार्थीहरूको नियमित पढाइ छैन। उनीहरुको भविष्य अन्योल बनेको छ ।

विश्वविद्यालयका राजिष्ट्रार भगवान ठाकुरका अनुसार नयाँ शैक्षिक सत्रका लागि कात्तिकमै सञ्चालन हुनुपर्ने कक्षा सुरु भएको छैन । विश्वविद्यालय सञ्चालनमा रहेको घर भाडा नदिए खाली गराइदिने घरबेटीहरूको चेतावनी दिने गरेका छन् । एक अर्ब ७० लाख लागतमा निर्माणाधीन विश्वविद्यालय भवन अलपत्र छ ।