पूर्वीनाकाबाट १९ अर्बको कृषिजन्य वस्तु निर्यात

काठमाडौं । पूर्वीनाका काँकडभिट्टाबाट आर्थिक वर्ष ०८०/८१ मा कृषिजन्य उपभोग्य एवं औद्योगिक वस्तुको आयातभन्दा निर्यात बढी भएको छ। यस वर्ष यी वस्तुको व्यापारमा पूर्वीनाका नाफामा गएको हो। प्लान्ट क्वारेन्टिन कार्यालय काँकडभिट्टाका सूचना अधिकारी चन्द्रेश्वर यादवका अनुसार आर्थिक वर्ष ०८०/८१ मा १४ अर्ब ३४ करोड ५१ लाख ९५ हजारको विभिन्न कृषिजन्य वस्तु आयात भएको छ।

सोही अवधिमा काँकडभिट्टा नाका भएर १८ अर्ब ९५ करोड ७८ लाख ८५ हजार मूल्यबराबरको वस्तु विदेश निर्यात भएको उनले जानकारी दिए। गत आवको आयातको तुलनामा आव ०८०/८१ मा चार अर्ब ६१ करोड २६ लाख ९० हजार मूल्यबराबरको कृषिजन्य वस्तु बढी निर्यात भएको हो।

निर्यात भएका कृषिजन्य वस्तुमा तरकारी, फलफूल, बिरुवा, जडीबुटी, प्रशोधित सामग्री, औद्योगिक बाली, चिया, अम्रिसो, अलैँची, काठका हस्तकला सामग्री, मसला बाली, बिउबिजनलगायत छन्। चिराइतो (जडीबुटी) बाहेक सम्पूर्ण वस्तु भारत निकासी हुने गरेको छ । चिराइतो भने भारत र बंगलादेश दुवै मुलुकमा निर्यात हुने गर्छ।

आयात हुने कृषिजन्य वस्तुमा खाद्यान्न, दलहन, तेलहन, ताजा तरकारी, फलफूल, बोटबिरुवा, जडीबुटी, दाल, लसुन, आलु, ब्रानलगायत रहेको सूचना अधिकारी यादवले जानकारी दिए। काँकडभिट्टा नाका भएर आयात हुने खाद्य वस्तुमा मकै, फापर, कोदो रहेको छ।

यस नाकाबाट उक्त अवधिमा जम्मा रु। ९१ करोड ५६ लाख ८१ हजार मूल्यबराबरको खाद्य वस्तु आयात भएको छ। आयातित कृषिजन्य वस्तुमध्ये ताजा तरकारी र ताजा फलफूल धेरै छ। कार्यालयको तथ्यांकअनुसार रु। चार अर्ब ८७ करोड ६५ लाख १५ हजारको ताजा फलफूल रु। चार अर्ब ५६ करोड २३ लाख ८० हजारको ताजा तरकारी एक वर्षमा आयात भएको छ।

निर्यातको ठूलो अंश औद्योगिक बाली र मसाला बालीले ओगटेको छ। धेरै निर्यात हुने कृषिजन्य वस्तुको सूचीमा चिया, अम्रिसो, अदुवा र प्लाइउड भारत निर्यात हुने गरेको छ। भारतबाहेकका मुलुकमा निर्यात थोरै छ।