राष्ट्र बैंकले भुक्तानी व्यवस्थामा के के गर्‍यो संशोधन ?

एकै प्रकृतिका डेबिट, क्रेडिट वा प्रिपेडको एक भन्दा बढी कार्ड जारी गर्न नपाउने

काठमाडौं । नेपाल राष्ट्र बैंकको नयाँ व्यवस्थासँगै अब बैंक तथा वित्तीय संस्थाले एक व्यक्तिको खाताबाट एकै प्रकृतिका डेबिट, क्रेडिट वा प्रिपेडको एक भन्दा बढी कार्ड जारी गर्न नपाउने भएका छन् ।

राष्ट्र बैंकको भुक्तानी विभागले आज बुधबार भुक्तानी प्रणाली सम्बन्धी एकीकृत निर्देशन जारी गर्दै यस्तो व्यवस्था गरेको हो ।

बैंक तथा वित्तीय संस्थाका ग्राहकले मोबाइल बैकिङ तथा इन्टरनेट बैंकिङ प्रणाली सञ्चालन वा कारोबार गर्दा भीपीएनको प्रयोग गरेरनगरेको पहिचान गरी आधिकारिक भीपीएन प्रयोग नभएमा लग इन गर्न नमिल्ने व्यवस्था गरेको छ ।

त्यस्तै ग्राहकले मोबाइल बैंकिङ तथा इन्टरनेट बैंकिङ प्रणाली सञ्चालन वा कारोबार गर्दा ‘भीपीएन’ प्रयोग गरे नगरेको पहिचान गरी आधिकारिक भीपीएन प्रयोग नभएमा एपमा लगइन गर्न नमिल्ने व्यवस्था संस्थाहरुले मिलाउनुपर्ने छ ।

विद्युतीय वालेटमार्फत हुने कारोबारको अधिकतम सीमाहरु भने यथावत राखिएको छ । बैंक खाताबाट वालेटमा प्रतिदिन २ लाख प्रतिमहिना १० लाख, वालेटबाट बैंक खातामा (क्युआरसहित) दैनिक २ लाख, प्रतिमहिना १० लाख तथा एक वालेटबाट अर्को वालेटमा दैनिक ५० हजार र प्रतिमहिना ५ लाखको सीमा कायम छ । यद्यपि सरकारी कार्यालयमा हुने भुक्तानीमा भने सीमा लागू हुँदैन ।

यूएसएसडी प्रणालीमा आधारित भुक्तानी कारोबारको अधिकतम सीमा दैनिक १० हजार रुपैयाँ र प्रतिकारोबार ५ हजार हुनुपर्ने छ । ग्राहकलाई विद्युतीय कार्ड जारी गर्दा आवेदन फारमसँगै कार्ड जारी गर्दा र कारोबार गर्दा लाग्ने शुल्क, कारोबारको सीमा, कार्डको प्रयोग गर्दा लाग्ने ब्याजदर, कार्डबाट प्राप्त हुने अन्य सुविधाहरू लगायतका विषय समेटिएको सूचनामूलक सामाग्री प्रदान गर्नुपर्ने छ । अनुमतिपत्रप्राप्त संस्था २०८५ असार मसान्तभित्र पब्लिक लिमिटेड कम्पनीको रुपमा परिणत भई सक्नुपर्ने छ ।