इप्पान ‘ऊर्जा ज्योति सम्मान, २०८२’ वरिष्ठ ऊर्जाविज्ञ अधिकारीलाई

काठमाडौं । यस वर्षको ‘ऊर्जा ज्योति सम्मान, २०८२’ बाट वरिष्ठ ऊर्जाविज्ञ प्रबल अधिकारी सम्मानित भएका छन् ।

स्वतन्त्र ऊर्जा उत्पादकहरूको संस्था, नेपाल (इप्पान) ले ऊर्जा क्षेत्रको विकास र विस्तारमा उल्लेख्य योगदान पुर्‍याउने एक जनालाई हरेक वर्ष ऊर्जा ज्योति सम्मानबाट सम्मानित गर्दै आएकोमा यस वर्षको सम्मान अधिकारीले पाएका हुन् ।

मङ्गलबार इप्पानको २३औं वार्षिक साधारणसभाको अवसरमा पूर्वप्रधानमन्त्री तथा नेपाली कांग्रेसका सभापति शेरबहादुर देउवाले ऊर्जामन्त्री दीपक खड्का, वन तथा वातावरण मन्त्री ऐनबहादुर शाही, इप्पान अध्यक्ष गणेश कार्की र ऊर्जा ज्योति सम्मानका संस्थापक इप्पानका पूर्वअध्यक्ष शैलेन्द्र गुरागाईंलगायतका अतिथिहरूमाझ अधिकारीलाई नगद १ लाख रुपैयाँको चेक र सम्मानपत्रसहित सम्मान गरेका हुन् ।

इप्पानका पूर्वअध्यक्ष गुरागाईंले उनकी स्व. छोरी श्रीनिका गुरागाईंको स्मृतिमा वि.स. २०७६ सालमा ‘ऊर्जा ज्योति सम्मान’ स्थापना गरेका थिए ।

कुनै सार्वजनिक पद धारण गरेर वा नगरेर ऊर्जा क्षेत्रको विकास र विस्तारमा उल्लेख्य योगदान पुर्‍याउनेमध्येबाट इप्पान कार्यसमितिले छनोट गरेको एक जनालाई इप्पानको साधारणसभाको अवसर पारेर हरेक वर्ष यो सम्मान प्रदान गरिँदै आएको छ ।

नेपाल विद्युत प्राधिकरणमा तीन दशक सेवा गरी उपकार्यकारी निर्देशकबाट सेवानिवृत्त भएका ऊर्जाविज्ञ अधिकारीले ऊर्जा मन्त्रालयमा वरिष्ठ ऊर्जाविज्ञको रूपमा करिब एक वर्ष काम गरेका थिए । विद्युत प्राधिकरणको विद्युत व्यापार विभागमा लामो समय काम गरेका उनले विद्युत व्यापारमा राष्ट्रिय तथा अन्तर्राष्ट्रिय विज्ञता हासिल गरेका छन् । सार्वजनिक पदमा नरहँदा पनि निजी क्षेत्रलाई सङ्कुचित बनाउने गरी चालिएका विभिन्न सरकारी कदमको तर्क र तथ्यसङ्गत खण्डन गर्दै ऊर्जा विकासमैत्री वातावरणका लागि निरन्तर खबरदारी गरिरहने व्यक्तिको रूपमा अधिकारी निजी क्षेत्रमाझ परिचित छन् ।

सम्मान ग्रहण गर्दै ऊर्जाविज्ञ अधिकारीले नेपालको ऊर्जा विकासमा छोटोे समयमै अभूतपूर्व नतिजा दिएको निजी क्षेत्रको छाता संस्था इप्पानले गरेको सम्मानबाट ऊर्जा क्षेत्रमा थप क्रियाशील रहन उत्प्रेरित गरेको बताए ।

‘पूर्वप्रधानमन्त्री देउवाको हातबाट नगद एक लाख रुपैयाँसहितको ‘इप्पान ऊर्जा ज्योति सम्मान २०८२’ ग्रहण गर्दै गर्दा विद्युत क्षेत्रको विकास र प्रवर्द्धनमा थप उत्साहित भई समर्पित भइरहने प्रेरणाका साथ गौरवान्वित महसुस गरेको छु,’ अधिकारीले भने ।

उनले सरकार र निजी क्षेत्रको सहकार्यबाटै ऊर्जा विकासमार्फत देशको सामाजिक–आर्थिक रूपान्तरणसहितको समृद्धि हासिल हुने विश्वास व्यक्त गर्दै यस अभियानमा सबै सरोकारवालाहरूको साथ, समर्थन र योगदान महत्त्वपूर्ण रहने पनि बताए ।

‘खासमा जलविद्युत उत्पादनमा निजी क्षेत्रको योगदान अत्यन्त उँचा रहेकाले मैले प्राप्त गरेको आजको यो सम्मान नेपालको समग्र निजी क्षेत्रलाई ‘डेडिकेट’ गर्न चाहन्छु,’ अधिकारीले भने ।