संसदको नयाँ अधिवेशनको सुरूमै संघीय शिक्षा ऐन पारित गराउँछौँ : प्रधानमन्त्री प्रचण्ड

‘शिक्षकहरूले सडक संघर्षले हामीलाई दबाब बढेको छ, जायज र सम्भव मागहरू सम्बोधन गरिनेछ’

काठमाडौं । प्रधानमन्त्री एवम् माओवादी केन्द्रका अध्यक्ष पुष्पकमल दाहाल ‘प्रचण्ड’ले संसदमा विचाराधीन विद्यालय शिक्षा ऐन नेपाल सरकारको उच्च प्राथमिकतामा रहेको बताएका छन् ।

आज शनिबार काठमाडौंको सीतापाइलामा एकीकृत अखिल नेपाल शिक्षक संगठनले आयोजना गरेको कार्यक्रममा उनले सरकारको उच्च प्राथमिकतामा रहेको संघीय शिक्षा ऐन संसदको नयाँ अधिवेशनको सुरू हुनेवित्तिकै पारित गराउने प्रतिबद्धता व्यक्त गरेका हुन् ।

कार्यक्रममा प्रधानमन्त्रीले भने, ‘तपाईहरू धेरैलाई सङ्घीय शिक्षा ऐन के हुन्छ भन्ने जिज्ञासा छ । अहिले संसद अधिवेशन समापन भएको छ । नयाँ अधिवेशन बोलाएपछि पहिलो काम नै सत्य निरूपण तथा मेलमिलाप सम्बन्धी ऐन र सङ्घीय शिक्षा ऐन संसदबाट पारित गराउन पहल हुन्छ । यो ऐन सरकारको उच्च प्राथमिकतामा छ ।’

प्रधानमन्त्रीले अगाडि भने, ‘तपाई शिक्षकहरूले आफ्ना माग र मुद्दा सम्बोधन गर्न सडकबाट समेत दबाब दिनुभयो । यसले सरकारलाई सहयोग पुगेको छ । तपाईहरूले अहिलेको मस्यौदामा जुन सुझावहरू दिनुभएको छ, त्यसमध्ये जायज र सम्भव मागहरू सम्बोधन गरिनेछ ।’