प्राइम कमर्शियल बैंकले सीईओलाई दियो २ करोड बढी तलब, भत्ता

काठमाडौं । प्राइम कमर्शियल बैंकले प्रमुख कार्यकारी अधिृकत (सीईओ)लाई २ करोड १० लाख १५ हजार रुपैयाँ तलब, भत्ता भुक्तानी गरेको छ ।

बैंकले गत आर्थिक वर्षमा सीईओ नारायण दास मानन्धरलाई तलब बापत १ करोड ८० हजार रुपैयाँ दिएको छ भने भत्ता बापत ८५ लाख २७ हजार, दशैं भत्ता बापत १४ लाख र सञ्चयकोषमा १० लाख ८ हजार रुपैयाँ दिएको छ ।

बैंकले सीईओलाई गाडी सुविधा, मोबाइल सुविधा, इन्धन सुविधा दिएको जनाएको छ । बैंकले सीईओलाई कार्यालय प्रयोजनको लागि चालक इन्धन र मर्मतसंभार सहित गाडी सुविधाको व्यवस्था गरिएको जनाएको छ ।

अन्य प्रमुख पदाधिकारीहरुलाई बैंकको नियमानुसार गाडी सुविधा उपलव्ध गराइएको छ । सीईओ लगायत कार्यकारी तहका अधिकृतहरुलाई बैंकको नियमानुसार मोवाइल बिलको भुक्तानी बैंकले गरिदिने व्यवस्था गरिएको छ ।

बैंकले गत आवमा सञ्चालकलाई ३० लाख ३० हजार रुपैयाँ बैठक भत्ता दिएको छ । सञ्चालक समितिको सदस्यलाई टेसलफोन, मोबाइल, पत्रपत्रिका तथा अन्य खर्च बापत १६ लाख ९६ हजार ३०२ रुपैयाँ भुक्तानी गरेको जनाएको छ ।

बैंकले गत आवको नाफाबाट सेयरधनीलाई ८.९५ प्रतिशत लाभांश दिने प्रस्ताव गरेको छ । जसमा बोनस सेयर ४ प्रतिशत र कर सहित ४.९५ प्रतिशत नगद लाभांश रहेको छ ।