गठबन्धनको चुनावी सभालाई सम्बोधन गर्न प्रधानमन्त्री बुटवल

काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवा स्थानीय तह निर्वाचनको प्रचार प्रसारमा जुटेका छन्। केही दिन अघि चितवन पुगेर गठबन्धनका लागि मत मागेका देउवाले हिजो काठमाडौंमा पनि गठबन्धनका लागि मत दिन आग्रह गरेका हुन्।

देउवा आज कांग्रेससहितको पाँच दलीय गठबन्धनले आयोजना गरेको चुनावी सभालाई सम्बोधन गर्न बुटवल पुगेका छन्। निर्वाचन कार्यक्रमअन्तर्गत बुटवलको देवीनगरमा आयोजना हुने चुनावीसभामा प्रधानमन्त्री देउवालगायत गठबन्धन दलका नेताहरुले सम्बोधन गर्ने कार्यक्रम तय भएको नेपाली कांग्रेस रुपन्देही क्षेत्र नं २ का सचिव प्रजापाल गिरीले जानकारी दिए।

चुनावी कार्यक्रमलाई प्रधानमन्त्री देउवासहित गृहमन्त्री बालकृष्ण खाण, पूर्वप्रधानमन्त्री तथा नेकपा (एकीकृत समाजवादी)का अध्यक्ष माधवकुमार नेपाललगायतका नेताहरुले सम्बोधन गर्ने कार्यक्रम रहेको छ।