नेपालमै पहिलोपटक श्रीमद्भागवत महापुराणको एकवर्षे प्रशिक्षण सुरु

काठमाडौं । नेपाल संस्कृत विश्वविद्यालयको आङ्गिक क्याम्पस वाल्मीकि विद्यापीठमा नेपालमै पहिलोपटक श्रीमद्भागवत महापुराणको एकवर्षे प्रशिक्षण सुरु भएको छ ।

नेपाल पञ्चाङ्ग निर्णायक विकास समितिले पुराणवाचक, कर्मकाण्ड गर्ने पुरोहित र ज्योतिषीलाई अनुमति पत्र (लाइसेन्स) दिने गरी तयारी थालेकै बेला विद्यापीठले प्रशिक्षण सुरु गरेको हो । आधिकारिक ज्ञान नै नभएकाले कथावाचन गरिरहेको गुनासो बढेकाले विद्यापीठले यस्तो प्रशिक्षण राखिएको जनाइएको छ ।

आज विद्यापीठमा आयोजित एक कार्यक्रममा प्रशिक्षणको उद्घाटन गरिए पनि कक्षा भने चैत ३ गते आइतबारदेखि सुरु हुने प्राचार्य अच्युत लामिछानेले जानकारी दिए । दिउँसो चार बजेदेखि प्रत्येक दिन एक घण्टा प्रशिक्षण दिइने उनले बताए । भागवत प्रशिक्षणका लागि ४५ जना प्रशिक्षार्थी आइसकेका छन् । चैत ३ गतेसम्म आउने ६० जनालाई पढाउन सकिने विद्यापीठले जनाएको छ । प्रशिक्षार्थीलाई भागवत पाठ गर्न, व्याख्या गर्न, वेदान्त, दर्शनजस्ता विषय सिकाइने छ ।

प्रशिक्षणमा गुरुत्व ग्रहण गर्न खोज्ने तर राम्रोसँग पाठ नगर्नेलाई सिकाउने गरी लक्षित गरिएको छ । उद्घाटन कार्यक्रममा धर्मशास्त्र विभागका प्रमुख एवं पञ्चाङ्ग निर्णायक विकास समितिका सदस्य प्रा डा देवमणि भट्टराईले जीवात्मालाई परमात्मासँग जोड्न पाठपारायण गरिने भएकाले त्यसका लागि प्रशिक्षण उपयोगी हुने बताए । यसका लागि यजमान पनि सचेत भएर योग्य वाचकको खोजी गर्नुपर्ने उनको भनाइ थियो ।

नेपाल प्राध्यापक सङ्घ वाल्मीकि विद्यापीठ समितिका सभापति प्रा मुकुन्दप्रसाद लामिछाने, प्रशिक्षण कार्यक्रम संयोजक चेतमणि न्यौपानेलगायतले यस्ता कार्यक्रमले संस्कार र संस्कृतिलाई सही रूपमा बचाउने भएकाले सुरु गर्नु परेको बताए । भागवत पाठपारायण र कथावाचन शुद्धसँग गर्ने अभ्यासका लागि प्रशिक्षण फलदायी हुने उनीहरूको भनाइ थियो ।

कम्तीमा उत्तरमध्यमा उत्तीर्ण गरी शास्त्री सुरु गरेका प्रशिक्षार्थीलाई प्राथमिकता दिइने जनाइएको छ । भागवत वाचनको अभ्यास सिक्न नेपालीहरू भारतको वृन्दावन, वनारसलगायत स्थानमा जाने गरेका छन् । नेपालमै भागवतको प्रशिक्षण सुरु गरिएको यो पहिलो पटक हो । शास्त्रीय रूपमा भने नेपाल संस्कृत विश्वविद्यालयअन्तर्गतका विद्यापीठमा इतिहास पुराण विषयमा तोकिएका विभिन्न पुराणका विषय पढाइ हुने गरेका छन् ।