सङ्घीय मामिलामन्त्री गुप्ताको दाबी : अलपत्र तीन विधेयकहरू आगामी अधिवेशनबाट पारित हुन्छन्

‘कुशले बनेका राजा बोकेर हिँड्न सुहाउँदैन’

पर्सा । सङ्घीय मामिला तथा सामान्य प्रशासनमन्त्री राजकुमार कुमार गुप्ताले अलपत्र रहेका महत्वपूर्ण विधेयकहरू अब चाँडै पारित हुने दाबी गरेका छन् ।

पर्साको वीरगञ्जमा सोमबार भएको नेपाल राष्ट्रिय शिक्षक सङ्गठन पर्साको १४औँ अधिवेशन उद्घाटन गर्दै उनले करिब एक दशकदेखि अलपत्र पर्दै आएका सङ्घीय निजामती सेवा, शिक्षा र नेपाल प्रहरीसम्बन्धी कानुनलाई संशोधन तथा एकीकरण गर्न तयार पारिएको विधेयक आगामी संसद अधिवेशनबाट पारित हुने दाबी गरेका हुन् ।

वर्षौँदेखि अलपत्र रहेका ती विधेयकका करिब एक हजार ८०० उप–दफाहरूमा दफावार छलफल भइसकेको जानकारी दिँदै उनले तीनवटै विधेयक संसदबाट बहुमतले पारित हुने विश्वास समेत व्यक्त गरेका छन् ।

कार्यक्रमलाई सम्बोधन गर्दे मन्त्री गुप्ताले विभिन्न प्रतिक्रियावादी शक्तिहरू सलबलाउन थालेकाले नेपाली जनताले त्यस्ता तत्वहरूलाई तह लगाउने चेतावनी दिए । उनले भने, ‘देशमा अहिले गलत कुराको प्रचार भइरहेको छ । जो राजाले आफ्नो परिवार बचाउन सकेनन् उनले देश कसरी बचाउने ? त्यसकारण राजाबाट मुलुकमा विकास र समृद्धि सम्भव छैन ।’ अहिलेको अवस्थामा गणतन्त्रको विकल्प नरेहेको धारणा उहाँले व्यक्त गरेका छन् ।

सामन्तवादीको आडमा अडिएको राजतन्त्र हटाएर जनताले लोकतन्त्र ल्याएको इतिहास स्मरण गराउनुहुँदै मन्त्री गुप्ताले राजाको नाममा मैदानमा उत्रिने नेताहरू लोकतन्त्रविरोधी भएको आरोपसमेत लगाएका छन् । राजदरबार हत्या काण्डपछि क्रमबद्ध राजकुमार दीपेन्द्रको निधन भएलगत्तै नेपालमा शाहवंशीय सत्ता विधिवत् रूपमा समाप्त भएको तर्क गर्दै मन्त्री गुप्ताले भने, ‘कुशले बनेका राजा बोकेर हिँड्नु नैतिकताले सुहाउँदैन ।’