रेखालाई जिताउन भोट माग्दै रेजिना

काठमाडौं । काठमाडौंको भृकुटीमण्डपमा जारी राष्ट्रिय प्रजातन्त्र पार्टीको एकता महाधिवेशनको दोस्रो दिन चुनावी प्रक्रिया सुरु भएको छ । उम्मेदवारहरु पनि महाधिवेशन प्रतिनिधिसँग भोट माग्न व्यस्त छन् ।

रेखासँग निकट मानिएकी नायिका रेजिना उप्रेती शनिबार महाधिवेशन थलो भृकुटीमण्डपमा रेखालाई भोट माग्दै गरेको बेला भेटिइन् । फिल्म लाइनको रेखा र रेजिनाको दोस्ती अहिले राप्रपाको महाधिवेशनमा देखिएको छ ।

दुई दशक लामो फिल्मी करियरबाट राजनीतिक लडाइमा होमिएकी रेखा आफूले जित्ने दावी पनि पेश गरिरहेकी छिन् । रेखालाई भोट माग्न अहिले लिङ्देन प्यानलका प्रतिनिधि मात्र हैन, फिल्म क्षेत्रका अन्य सेलेव्रिटी समेत व्यस्त देखिन्छन् । नायिका रेखा थापा यसपटक राप्रपा महाधिवेशनकी आकर्षण बनेकी छिन् । अध्यक्षका प्रत्यासी राजेन्द्र लिङ्देनको प्यानलबाट महामन्त्रीमा उम्मेदवारी दिएकी छिन् ।

यी दुई नायिकाको फिल्मी करियर लगभग समान छ । रेजिना अहिले चलचित्र कलाकार संघको कार्यसमितिमा पनि सक्रिय छिन् ।