स्याफ्रु-रसुवागढी सडक आजदेखि १५ दिन बन्द हुने, भन्सार कारोबार पनि नहुने

काठमाडौं । स्याफ्रु-रसुवागढी सडक खण्ड १५ दिन बन्द हुने भएको छ ।

सडक स्तरोन्नतिको काम हुने भएकाले तीन महिनासम्म हरेक महिना १५ दिन सडक बन्द हुने छ । जस अनुसार अप्रिल, मे र जुन महिनाको पहिलो १५ दिन सडक पूर्ण रूपमा बन्द हुने गल्छी त्रिशुली मेलुङ स्याफ्रुबेसी रसुवागढी सडक योजनाले जानकारी दिएको छ ।

सडक बन्द हुने भएसँगै रसुवागढी भन्सार पनि १५ दिनका लागि व्यावसायिक कारोबार बन्द हुने भएको छ ।

आयोजनाका अनुसार अप्रिल १ देखि १५, मे १ देखि १५ र जुन १ देखि १५ सम्म अत्यावश्यक बाहेक अन्य सवारी साधन सञ्चालनमा पूर्ण रोक लगाइएको छ । अप्रिल १ देखि चाइना एड स्याफ्रुबेसी रसुवागढी रिपियर एन्ड इम्प्रुभमेन्ट प्रोजेक्ट सुरु हुन लागेको हो ।

यस सडक खण्डको स्तरोन्नति चिनियाँ ठेकेदार सिजाङ थियनलुले गर्न लागेको हो । निर्माण पक्षले सडक बन्द गर्नुपर्ने बताए अनुसार सडक बन्द गर्न लागिएको सडक योजनाले जानकारी दिएको छ ।

त्यस्तै यस अवधिमा नागरिकको सामान्य जनजीवन प्रभावित नहुने गरी आपतकालीन र अति आवश्यक सवारीसाधनहरू सञ्चालनमा निर्माण व्यवसायीले सहजीकरण गर्ने बताइएको छ ।

स्याफ्रु–रसुवागढी सडकको दूरी १७ किलोमिटर रहेको छ । जसमा चिनियाँ पक्षले १५.८ किलोमिटर स्तरोन्नति गर्ने छ । यो अहिले एक लेनको कच्ची सडक रहेको छ । चिनियाँ पक्षले कालोपत्रे सहितको दुई लेनको सडक बनाउदैछ ।