भ्यालेन्सियामाथि पूनरागमन जित निकाल्दै रियल शीर्ष स्थानमा

  एजेन्सी । म्याड्रिड ,भ्यालेन्सियामाथि पूनरागमन जित निकाल्दै रियल म्याड्रिड स्पेनिस ला लिगाको शीर्ष स्थानमा उक्लिएको छ । आइतबार राति भएको खेलमा रियलले भ्यालेन्सियालाई उसैको मैदानमा २–१ गोलले हरायो । रियलले लिगमा अपराजित यात्रा पनि कायम राखेको छ ।

रियलको जितमा भिनिसियस जुनियर र करिम बेन्जेमाले गोल गरे । भ्यालेन्सियाका हुगो डुरोले सुरुवाती गोल गरेका थिए । सबै गोल दोस्रो हाफमा सम्भव भएको खेलमा भ्यालेन्सियाले ६६औं मिनेटमा खाता खोलेको थियो । हुगो डुरोले गोल गर्दै घरेलु टोलीको उत्साह जगाए ।

खेलको सुरुवातदेखि भ्यालेन्सियालार्य दबाबमा राखेको रियलले गोलका लागि अन्तिमसम्म कुर्नु परेको थियो । ८६औं मिनेटमा भिनिसियसले करिम बेन्जेमाको पासमा गोल गर्दै खेललाई बराबरीमा ल्याए । भिनिनियसको जारी लिगमा यो पाँचौं गोल हो ।

उनले पाँच खेलमा पाँचै गोल गरेका छन् । दुई मिनेट लगत्यै बेन्जेमाले भिनिसियसको पासमा गोल गर्दै रियलको जित पक्का बनाएका थिए । जारी लिगमा ६ गोल गरिसकेका बेन्जेमा सर्वाधिक गोल गर्ने खेलाडीको शीर्ष सुचीमा छन् ।

६१ प्रतिशत बल पोसेसन राखेको रियलले पहिलो हाफमा राम्रा अवसर खेर फालेको थियो । १८ वटा पोस्ट प्रहार गरेको रियलले अन्तिममा पुगेर कठिन जित निकाल्यो । भ्यालेन्सियाले १२ वटा पोस्ट प्रहार गरेको थियो । ३९ बल पोसेसन राखेको भ्यालेन्सियाको रियललाई रोक्ने प्रयास सफल भएन । रियलका भिनिसियस ‘म्यान अफ दी म्याच’ भए ।

जितसँगै शीर्षस्थान कब्जा गरेको रियलले पाँच खेलबाट १३ अंक बनाएको छ । दोस्रो स्थानमा रहेको एट्लेटिको म्याड्रिडको ११ अंक छ । रियलसँग पराजित भ्यालेन्सिया १० अंक सहित तेस्रो स्थानमा छ । चौथो स्थानमा रहेको रियल सोसिडाडको पनि १० अंक छ ।

आइतबार रातिनै भएको खेलमा रियल सोसिडाड सेभियासँग गोलरहित बरबरीमा रोकिएको थियो । अर्को खेलमा रियल बेटिस र स्पान्योलले २–२ गोलको बराबरी खेल्दै अंक बाँड्यो । घरेलु मैदानमा मालोर्का पनि भिल्लारियलसँग गोलरहित बराबरीमा रोकियो । लिग अन्तर्गत सोमबार राति बार्सिलोना र ग्रानाडाबीच प्रतिस्पर्धा हुनेछ ।

विश्वकै चर्चित लिग मध्येको एक स्पेनिस ला लिगा फुटबल पहिलो पटक नेपालमा डिशहोम एक्सन स्पोर्ट्स एचडी टेलिभिजन मार्फत प्रतक्ष हेर्न पाइने ब्यवस्था छ । त्यसका लागि डिशहोमको ग्राहक भने बन्नु पर्ने हुन्छ ।

ला लिगाको नेपालका लागि पे टिभी तथा डिजिटलको विशेष प्रसारणको अधिकार डिशहोमले प्राप्त गरेको हो । हाल डिशहोममा खेल च्यानलको रुपमा एक्सन स्पोर्टस एचडी १ र एक्सन स्पोर्टस एचडी २ प्रसारण भईरहेकोमा ला लिगाका खेलहरु एक्सन स्पोर्टस एचडी २ मा प्रशारण भईरहेको छ ।

त्यसका लागि ग्राहकले ला लिगा सिजनका लागि थप २ हजार रुपैयाँ तिर्नु पर्ने छ । हाल डिशहोमको ग्राहकलाई उपलब्ध रहेको ला लिगाको सिजन टिकट सिम टिभी, प्रभु टिभी र डिश होमको ओटीटी (डिशहोम गो) मार्फत उपलब्ध छ ।