राइड शेयरिङले बदलेको जीवन : परदेशको पीडादेखि स्वदेशको सफलतासम्म

विदेश जाने सोच बनाएका धेरै युवाले अब सोच बदलीरहेका छन् । शुभराज र जितजस्ता पात्रहरूले पुष्टि गरिदिएका छन् देशमै बसेर इज्जतका साथ कमाइ गर्न सकिन्छ

बिहानीको उज्यालो भर्खर काठमाडौंका गल्लीहरूमा ओर्लिन थालेको हुन्छ । सहर झुल्कँदै गर्दा, शुभराज सुनुवार आफ्नो ट्याक्सीको साँचो घुमाउँदै दिनको सुरूवात गर्छन् ।

हरेक दिन यात्रुहरूको स्वागत मुस्कानले गर्छन् र सुरक्षित गन्तव्यसम्म पुर्‍याउँछन् । देख्दा सामान्य लाग्न सक्ने यो दिनचर्या, उनको जीवन सङ्घर्षको गहिरो कथासँग जोडिएको छ ।

रामेछापका शुभराज १० वर्ष अगाडि कुवेत उडेका थिए । सपना थियो, आस्था थियो र मनमा थियो एउटा दृढ निश्चयी अठोट–परिवारको भविष्य उज्यालो बनाउने । आर्थिक अभावले थिचिरहेको परिवारलाई टेवा दिने उद्देश्यले उनी वैदेशिक रोजगारीमा लागे । विदेशमा उनले १० वर्ष पसिना बगाए । कठोर परिश्रम, असहज मौसम र झन् कठिन परिवेशमा उनले सपना देखेजस्तो कमाइ भने भएन । दु:ख बढ्दै गयो, अनि एकदिन त्यही परदेशमा रहेकै बेला उनी आमाको निधनको खबर सुन्छन् ।

सबभन्दा पीडादायक क्षण थियो त्यो, जब आमाको अनुहार हेर्ने अन्तिम अवसर पनि छुट्यो । मन नै रोकिएन, उनी भन्छन्, ‘आमाको मृत्युमा पनि घर आउन पाइनँ, त्यसपछि मलाई त्यहाँ बस्न मन लागेन ।’

देश फर्केर फेरि शून्यबाट सुरू

२०७२ सालमा उनी नेपाल फर्किए । आफ्नै बचतले ट्याक्सी किनेर यात्रुको सेवा सुरू गरे । सुरूका दिनहरू सजिला थिएनन् । चोकचोकमा उभिनुपथ्र्यो, यात्रु खोज्न घण्टौँ कुर्नुपथ्र्यो, ट्राफिकको गाली त सामान्य कुरा बनिसकेको थियो । तर, शुभराजले हार मानेनन् । ‘सुरूमा धेरै गाह्रो थियो,’ शुभराज भन्छन्, ‘तर सधैं कोसिस गरेँ । आफैंलाई विश्वास थियो कि कुनै न कुनै दिन राम्रो अवश्य हुन्छ ।’

यसरी बदलियो जीवनको मोड

शुभराज सन् २०२१ मा राइड शेयरिङ एप इन्ड्राइभ प्लेटफर्मसँग जोडिए । मोबाइलमार्फत यात्रु पाउन थालिएपछि उनको जिन्दगी नै सहज बन्दै गयो ।

‘अब त मोबाइल खोलेपछि नै यात्रु पाइन्छ,’ उनी मुस्कुराउँदै भन्छन्, ‘पहिले चोकमा उभिनुपथ्र्यो, ट्राफिकले लखेट्थ्यो, लाज पनि लाग्थ्यो । अब त चिया खाँदै मोबाइल चलाउँछु, यात्रु आफैं बोलाउँछन् ।’

आज उनी दैनिक तीनदेखि चार हजार रूपैयाँसम्म कमाउँछन् । ‘कुवेतको भन्दा दोब्बर कमाउँछु अहिले,’ उनी भन्छन्, ‘महिनामा राम्रै बचत हुन्छ, घरको खर्च सजिलै धानिन्छ ।’ शुभराज अहिले काठमाडौंमा परिवारसहित बस्दैछन् । पहिलाको भन्दा धेरै हदसम्म सहज भएको महसुस हुन्छ उनलाई । ‘देशमै काम गरेर, परिवारसँगै बस्न पाइने जीवन, त्यो नै वास्तविक सुख हो,’ उनले गर्वका साथ हामीलाई सुनाए ।

हालै उनी इन्ड्राइभबाट उत्कृष्ट चालक घोषित भए र पुरस्कारस्वरूप कार जिते । पुरस्कार जितेपछि मेहनत गरेपछि निम्न वर्गको पनि दिन आउने रहेछ भन्ने लाग्छ उनलाई ।

०००

धादिङका जित थापा पनि शुभराजको कथा जस्तै एउटा उदाहरण हुन् । आर्थिक कठिनाइका बीच विदेशिने निर्णय गरेर वैदेशिक रोजगारीका लागि मलेसियातिर लागका थिए । तीन वर्षको कन्ट्र्याक्ट अवधि थियो, तर उनले दुई वर्षमै फर्किने निर्णय गरे । ‘कमाइ राम्रो थिएन, काम पनि गाह्रो । फेरि लाग्यो, किन अर्काको देशमा पसिना बगाउने ?’ जित भन्छन्, ‘त्यो मेहनत आफ्नै देशमा लगायो भने केही त हुन्छ ।’

त्यही सोचले उनलाई देश फर्कायो । केही समय घरमै बसे, खेतीपाती गरे । सधैं गाउँमा बसेर केही हुदैन भन्ने लागेर उनी काठमाडौं आए । काम खोज्दै हिँड्दा उनी इन्ड्राइभसँग जोडिए । सवारी चलाउने सिप त पहिल्यै थियो, त्यसलाई उनले रोजगारीको माध्यम बनाए । अहिले उनी मोटरसाइकलमा इन्ड्राइभ सेवा दिँदै छन् ।

‘जति मेहनत, त्यति आम्दानी’

जित भन्छन्, ‘इन्ड्राइभ चलाउँछु, बिहान निस्कन्छु, दिनभर यात्रु बोक्छु, अनि बेलुका घर फर्किन्छु । परिवारसँगै छु, कामबाट सन्तुष्ट छु ।’ उनको मासिक आम्दानी ५० देखि ६० हजार रूपैयाँसम्म पुग्छ । खर्च कटाएर पनि झन्डै ४५ हजार जोगिन्छ ।

‘विदेशमा हुँदा यस्तो आम्दानी थिएन,’ उनी स्पष्ट रूपमा भन्छन्, ‘मेहनत गरे देशमै सफलता हासिल गर्न सकिने रहेछ ।’ हालै उनले पनि इन्ड्राइभबाट मोटरसाइकलसहित उत्कृष्ट चालकको उपाधि पाएका छन् ।

उनी भन्छन्, ‘देशमा केही छैन भन्ने गलत भाष्य निर्माण भइरहेको छ । आँखा चाहिन्छ अवसर देख्न, अठोट चाहिन्छ सफलता हासिल गर्न । यी दुई भए जीवन आफै बदलिन्छ ।’
शुभराज र जित जस्ता युवाहरूलाई राइड शेयरिङ एप इन्ड्राइभले आत्मनिर्भर बनाएको छ । हतारको समयमा यात्रुलाई सुलभ मूल्यमा गन्तव्यमा पुर्‍याएका छन् ।

११ लाखभन्दा बढी प्रयोगकर्ताहरू रहेको इन्ड्राइभ अहिले काठमाडौं उपत्यका, पोखरा, चितवन लगायतका सहरमा सञ्चालनमा छ । यो प्लेटफर्मले यात्रुलाई छिटो र सस्तोमा गन्तव्यमा पुर्‍याउने मात्रै होइन, रोजगारी सृजनामा समेत महत्वपूर्ण भूमिका खेलिरहेको छ ।

विदेश जाने सोच बनाएका धेरै युवाले अब सोच बदलीरहेका छन् । शुभराज र जितजस्ता पात्रहरूले पुष्टि गरिदिएका छन् देशमै बसेर इज्जतका साथ कमाइ गर्न सकिन्छ ।