सवारी चालक उन्नत तालिम शुरू

काठमाडौं । राष्ट्रिय प्रहरी प्रशिक्षण प्रतिष्ठान महाराजगञ्जको तत्वावधानमा प्रहरी प्रधान कार्यालय सवारी महाशाखामा सञ्चालन हुने १५औं समूहको सवारीचालक उन्नत (यान्त्रिक ज्ञान) तालिम शुरू भएको छ ।

सोही महाशाखाका प्रहरी वरिष्ठ उपरीक्षक ई. नरोत्तम लाल प्रधानले आज बिहीबार महाशाखामा आयोजित एक कार्यक्रमबीच उक्त तालिमको उद्‍घाटन गरे । संगठनलाई आवश्यक पर्ने दक्ष सवारी चालक तथा मेकानिकको आवश्यकता परिपूर्ति गर्नका लागि आधुनिक प्रविधिको प्रयोग गरी तालिम शुरू गरिएको उनले बताए ।

जम्मा ३० कार्यदिन अवधि रहेको उक्त तालिममा प्रहरी हवल्दार ६ जना र प्रहरी जवान २६ जना गरी कुल ३२ जना प्रशिक्षार्थीको सहभागिता रहेको तालिम संयोजक प्रहरी नायव उपरीक्षक ई. कमलेन्द्र लाल कर्णले जानकारी दिए ।

हालसम्ममा ४५४ जना प्रहरी कर्मचारीहरुले सवारी चालक उन्नत तालिम हासिल गरिसकेको उक्त महाशाखाले जनाएको छ ।