घ्याम्पेडाँडा-रानीकोट हुँदै पनौती जाने सडकको स्तरोन्नति सुरु

भक्तपुर । पहिरोका कारण दुर्घटनाको उच्च जोखिममा परेको भक्तपुरको पर्यटकीय क्षेत्र घ्याम्पेडाँडा रानीकोट हुँदै पनौती जाने सडकको स्तरोन्नति सुरु भएको छ ।

सूर्यविनायक चोकबाट घ्याम्पेडाँडा, रानीकोट हुँदै काभ्रेको पनौती जोड्ने सडकमा पहिरो गएपछि सवारीसाधन आवागमनमा समस्या पर्नुका साथै पहिरोका कारण दुर्घटनाको जोखिम बढेपछि स्थानीय सरकारले स्तरोन्नति सुरु गरेको हो ।

सूर्यविनायक नगरपालिका–८ वडा वडाध्यक्षसमेत रहेका प्रवक्ता सापकोटाले घ्याम्पेडाँडा–रानीकोट सडक पहिरोले समस्यामा पारेको जानकारी पाएपछि आजैदेखि लागत खर्च नगरपालिकाले व्यहोर्ने गरी मर्मत सुरु गरिएको बताए ।

रानीकोटका पर्यटन व्यवसायी एवं भिलेज होटल हाइल्याण्ड रिसोर्टका सञ्चालक रामसुन्दर बकेँले भक्तपुरबाट पनौती जाने एक मात्र वैकल्पिक मार्गका रूपमा उक्त खण्ड वडा कार्यालयको नेतृत्वमा मर्मत सुरु भएकामा खुसी व्यक्त गरे । उनले योसँगै यहाँ आउने पर्यटक तथा सर्वसाधारणलाई आवागमनमा सहज हुने विश्वास व्यक्त गरे ।

बकेँले भने, “सूर्यविनायकबाट काभ्रेको पनौती पुग्ने छाटो दूरीको यो एक मात्र मार्ग हो । यो पर्यटकीय सडक भएकाले आन्तरिक तथा बाह्य पर्यटकलाई सास्ती हुँदै आएको थियो । स्तरोन्नति भएपछि यात्रा सहज हुनुका साथै व्यावसाय बढ्ने विश्वास लिएका छौँ ।” उनका अनुसार यहाँ आउने पर्यटकको चाप बढिरहेको अवस्थामा एक महिनादेखि पटकपटक पहिरो गएर सडक अवरुद्ध भएको थियो ।

“केही दिनयता खानेपानीको मूल पाइप फुटेर पानी बगेपछि थप पहिरो गएर जोखिम बढेको थियो, नगरपालिकाले मर्मत सुरु गरेसँगै पर्यटन व्यवसायी खुसी भएका छौँ”, बकेँले भने । पहिरो जान थालेपछि पनौतीबाट दूध, तरकारीलगायत सामग्री बोकेर सूर्यविनायक आउने–जाने यातायातमा कमी आउनाका साथै घ्याम्पेडाँडा र रानीकोट जाने स्थानीयवासी र पर्यटकलाई सास्ती भएको थियो ।

पर्यटन व्यवसायी बकेँले भने, “रानीकोटमा आन्तरिक र बाह्य पर्यटकको उल्लेख्य आगमन हुने गरेको छ । सडकका कारण पर्यटन व्यवसायमा समेत समस्या आएको थियो । घ्याम्पेडाँडामाथि रानीकोटसम्म आएको पहिरो हरेक वर्ष डोजर लगाएर पन्छाउँदै आएका थियौँ । अहिले ठूलो पहिरो गएपछि वडा कार्यालयले मर्मत सुरु गरेका छ । यसले हामी पर्यटन व्यवसायी उत्साहित छौँ ।”