उत्तर कोरियाले अक्टोबरमा तीन हजार सेना रूस पठाएको अमेरिकाको दाबी

उत्तर कोरियाले कम्तीमा तीन हजार उत्तर कोरियाली सेना अक्टोबरमा रूसमा पठाएको ह्वाइट हाउसले दाबी गरेको छ । ह्वाइट हाउसका अनुसार उनीहरू युक्रेनविरूद्धको लडाइँमा सहभागी हुने अत्यधिक सम्भावना रहेको छ ।

ह्वाइट हाउसका राष्ट्रिय सुरक्षा सञ्चार सल्लाहकार जोन किर्बीले बुधबार पत्रकार सम्मेलनलाई सम्बोधन गर्दै उत्तर कोरियाली सैनिकहरू युक्रेनसँग लड्न रूस जाँदै गरेको सार्वजनिक सूचना पाएको बताए ।

सेना उत्तर कोरियाको वोनसनबाट रूसको भ्लाडिभोस्टोकसम्म जहाजमार्फत गएको बताउँदै हाल उनीहरू रूसी सैन्य प्रशिक्षणमा रहेको बताए । प्रशिक्षणपछि सैनिकहरू युक्रेनी सेनाविरूद्ध लडाइँमा संलग्न हुन सक्ने चिन्ता उनले व्यक्त गरे ।

किर्बीले अमेरिकाले युक्रेनी सरकारलाई उनीहरूको अवस्थाबारेमा जानकारी दिएको बताउँदै उत्तर कोरियाले मस्को र किएभबिचको द्वन्द्वमा प्रवेश गरेमा युद्धमा रूस कायरतालाई उजागर गर्ने उल्लेख गरे ।

युक्रेनविरूद्धको युद्धमा रूसले हरेक दिन असाधारण हताहत भोगिरहेको बताउँदै किर्बीले अझै रूसी राष्ट्रपति भ्लादिमिर पुटिनले राष्ट्रसङ्घीय सुरक्षा परिषद्का प्रस्तावको विपरीत युक्रेनसँग द्वन्द्व जारी राख्न चाहेको बताए ।

ह्वाइट हाउसका वरिष्ठ अधिकारीले युद्धका लागि युक्रेनलाई अमेरिकी सहयोगको बारेमा कुरा गर्दै अमेरिका युक्रेनलाई थप युद्व सामाग्रीहरू प्रदान गर्ने तयारीमा रहेको बताए । उनले अमेरिकी राष्ट्रपति जो बाइडेन युक्रेनलाई सहयोग गर्न कटिबद्ध रहेको समेत जानकारी दिए ।

युक्रेनका लागि अमेरिकी समर्थनको पुष्टि गर्दै उनले आगामी दिनमा अमेरिकाले युक्रेनविरूद्ध रूसको युद्धका समर्थकलाई लक्षित गरी महत्त्वपूर्ण प्रतिबन्धको घोषणा गर्ने जनाए ।