बिहीबार, कात्तिक १२, २०८३
कर्पोरट खबर
10:30 am, बिहीबार, कात्तिक १२, २०८३
काठमाडौं । सगरमाथा लुम्बिनी इन्स्योरेन्स कम्पनी लिमिटेड (सलिको) ले आगामी शनिबार गोकर्ण फरेस्ट रिसोर्टको गल्फ कोर्समा “सलिको गल्फ प्रतियोगिता २०२६” आयोजना गर्ने भएको छ ।
व्यक्तिगत ग्राहक, व्यवसाय तथा कर्पोरेट क्षेत्रका ग्राहकहरूलाई लक्षित गर्दै विभिन्न प्रकारका निर्जीवन बीमा सेवा प्रदान गर्दै आएको सगरमाथा लुम्बिनी इन्स्योरेन्सले यस वर्षको प्रतियोगिता गोकर्ण फरेस्ट रिसोर्टको १८ होलको च्याम्पियनसिप स्तरको पार–७२ गल्फ कोर्समा आयोजना गर्न लागेको हो ।
करिब १०० जना एमेच्योर गल्फ खेलाडीहरूको सहभागिता रहने अपेक्षा गरिएको यस प्रतियोगितामा मुख्यत: नेपालको कर्पोरेट क्षेत्रका प्रतिनिधिहरू सहभागी हुने बताइएको छ । प्रतियोगिताले प्रतिस्पर्धात्मक खेल, आकर्षक पुरस्कार तथा सहभागीहरूबीच आपसी सम्बन्ध विस्तार, सहकार्य र मित्रता अभिवृद्धि गर्ने अवसर प्रदान गर्ने कम्पनीको विश्वास छ ।
प्रतियोगितामा विभिन्न विधामा पुरस्कार प्रदान गरिनेछ । पुरस्कारका विधाहरूमा पुरुषतर्फ विजेता, उपविजेता, उत्कृष्ट ग्रस (सर्वोत्कृष्ट ग्रस); महिलातर्फ विजेता, उपविजेता; वरिष्ठ (सिनियर) तर्फ विजेता(६० वर्ष वा सोभन्दा माथि), सुपर सिनियर विजेता (७० वर्ष वा सोभन्दा माथि),सबैभन्दा धेरै बर्डी, पिनको सबैभन्दा नजिक, सबैभन्दा लामो ड्राइभ तथा सलिको३० वर्षको विश्वास – विजेता रहेका छन् ।
प्रतियोगितालाई थप मनोरन्जनात्मक र रोमाञ्चक बनाउन होल नं. १० मा होल–इन–वानगर्ने पहिलो खेलाडीले टाटा नेक्सन कार जित्ने अवसर प्राप्त गर्नेछन् । प्रतियोगिताको सबैभन्दा आकर्षक पक्षमध्ये एक यस पुरस्कारले खेलाडीहरूमा थप उत्साह सिर्जना गर्ने अपेक्षा गरिएको छ।
प्रतियोगिताबारे आफ्नो धारणा व्यक्त गर्दै सलिकोका प्रमुख कार्यकारी अधिकृत चंकी क्षेत्रीले सरोकारवालाहरू तथा समग्र कर्पोरेट समुदायसँग अर्थपूर्ण सम्बन्ध स्थापित गर्ने निरन्तर प्रयासको एक हिस्साका रूपमा “सलिको गल्फ प्रतियोगिता २०२६” आयोजना हुँदै आएको बताए । उनले खेलकुदका यस्ता कार्यक्रमहरू प्रतिस्पर्धामा मात्र सीमित नभई आपसी सद्भाव अभिवृद्धि गर्ने, व्यावसायिक सम्बन्धलाई थप सुदृढ बनाउने तथा इमानदारी, खेल भावना र पारस्परिक सम्मानजस्ता साझा मूल्यका माध्यमबाट मानिसहरूलाई एकै ठाउँमा जोड्ने महत्वपूर्ण अवसर भएको बताए ।
यस प्रतियोगिताले व्यावसायिक कारोबारभन्दा बाहिर रहेर पनि आफ्ना सरोकारवालाहरूसँग सम्बन्ध विस्तार गर्ने र विश्वास तथा दीर्घकालीन साझेदारीलाई थप मजबुत बनाउने अर्थपूर्ण अनुभव सिर्जना गर्ने सलिकोको प्रतिबद्धतालाई प्रतिबिम्बित उनको भनाइ छ ।
