सुरक्षा व्यवस्था मजबुत छ, ढुक्क भएर मतदान गर्नुस् : गृहमन्त्री 

काठमाडौँ । गृहमन्त्री बालकृष्ण खाणले मुलुकमा शान्ति सुरक्षाको अवस्था मजबुत रहेकाले ढुक्क भएर मतदान गर्न आग्रह गरेका छन् ।

निर्वाचन घरदैलोका क्रममा रुपन्देहीमा दिएको अन्तर्वार्तामा उनले भने , “सुरक्षाको सम्पूर्ण तयारी पूरा भएको छ, विभिन्न कार्य योजना बनाएर निर्वाचन सुरक्षा व्यवस्था चुस्त बनाएका छौँ, सबै देशवासीले आआफ्ना मतदान केन्द्रमा गएर ढुक्क भएर मतदान गर्नुहोला ।”

उनले गत वैशाखमा पनि एकै दिन देशैभरि एक चरणमा शान्तिपूर्ण र निष्पक्ष निर्वाचन गराएको प्रसङ्ग उल्लेख गर्दै भने, “पहिले पहिले स्थानीय तहको निर्वाचन विभिन्न चरणमा गर्ने गरेकामा यस वर्ष हामीले एकै दिन बडो सौहार्दपूर्णरुपमा निष्पक्षरुपमा सम्पन्न गर्‍यौँ, हामीलाई यसबाट पनि आत्मबल बढेको छ, अहिले पनि सुरक्षा व्यवस्था चुस्त बनाएका छौँ ।”
मुलुकका चारै निर्वाचन निकायका बिचमा चुस्त समन्वय रहेको र हिमाल पहाड र तराईमा निर्वाचन क्षेत्र र जिल्लाको संवेदनशीलता हेरेर सुरक्षा व्यवस्था अपनाइएको जानकारी उनले दिए ।

मतदाता, उम्मेदवार, कर्मचारी, निर्वाचनमा खट्ने सबै व्यक्ति, मतपत्रको सुरक्षा गर्नु राज्यको कर्तव्य हो भन्ने विषयलाई वर्तमान सरकारले ध्यानमा राखेको र सोहीबमोजिम नै नागरिक तथा मतदानपछि मतपेटिका र सबै अवस्थाको सुरक्षा चुस्त बनाइएको गृहमन्त्री खाणले बताए।

उनले कुनै पनि किसिमको बाधा व्यवधान नहुने स्पष्ट गर्दै सबै नेपाली नागरिकलाई निर्वाचनमा सक्रियतापूर्वक सहभागी हुन र ढुक्क भएर मतदान गर्न आग्रह गरे । उनले नेपाली काँग्रेस आगामी निर्वाचनपछि सबैभन्दा ठुलो दल बन्ने दाबी पनि गरे ।

उनले भने, “नेपाली काँग्रेस सबैभन्दा ठुलो पार्टी बन्छ र काँग्रेस नेतृत्वकै सत्तारुढ पाँच दलीय गठबन्धनले सरकार निर्माण गर्न मिल्ने सजिलो बहुमत हासिल गर्दछ ।” इतिहासमा समय समयमा मुलुकलाई सङ्कट परेका बेला नेपाली काँग्रेसले नै नेतृत्व प्रदान गर्दै आएको, कोरोना महामारीको सङ्कट साथै संविधानमाथि नै हस्तक्षेप गरी संसद् विघटन भइरहेका बेला संविधान र प्रजातन्त्रको संरक्षणका लागि काँग्रेसले नै नेतृत्व प्रदान गरेको विगतको यथार्थका कारण यस पटक पनि नेपाली जनताले काँग्रेसलाई पहिलो पार्टी बनाउने उनको भनाइ थियो ।

उनले सत्तारुढ गठबन्धनले आसन्न निर्वाचनमा स्पष्ट बहुमत ल्याउने र यही गठबन्धनको सरकार बन्ने पनि दाबी गरे । निर्वाचनपछिको प्रधानमन्त्री को हो भन्ने प्रश्नमा उनले अहिले नै यसको निक्र्यौल नभएको र चुनावपछि यसको निर्णय हुने बताए ।

उनले भने, “हामी गठबन्धन मिलेर नै निर्वाचनमा गएका छौँ, हाम्रा उम्मेदवार नै साझा छन् र हामी ती उम्मेदवारलाई जिताउन पनि सबै जना सहकार्य गरेर लागेका छौँ, त्यसैले भोलि निर्वाचनपछि को प्रधानमन्त्री हुन्छ भन्ने विषय पनि गठबन्धनको साझा निर्णयका आधारमा नै हुनेछ ।”

उनले लुम्बिनी प्रदेशको राजधानी बुटवलमा नै हुनुपर्ने र आफूहरूले चुनावपछि त्यसैका लागि पहल गर्ने पनि बताए । यसअघि देश महामारीको सङ्कटमा परेर ठप्प भएका बेला अकास्मात् प्रदेश राजधानी अन्यत्रै सार्ने काम गरिएका र बुटवलबाहेक प्रदेश राजधानी बनाउन मिल्ने अर्को कुनै ठाउँ नरहेको भन्दै प्रदेश राजधानी बुटवलमै हुनुपर्नेमा र त्यसका लागि आफुहरु लाग्ने बताए ।

गृहमन्त्री खाणले आफू सधैँ स्थानीय जनताका माग र उनीहरूका आवश्यकता बुझेर अघि बढ्ने गरेको र आफूले जहिले पनि रुपन्देहीको विकासलाई प्राथमिकतामा राख्ने गरेकाले यस पटक पनि आफू यहाँका नागरिकले विजयी गराउनेमा ढुक्क रहेको बताए ।

रुपन्देही क्षेत्र नं ३ मा नेपाली काँग्रेसका तर्फबाट प्रतिनिधिसभा सदस्यका उम्मेदवार खाणले यहाँका नागरिकले प्रदेश राजधानीका साथै कृषि मल, बीउको उपलब्धता, सुकुम्बासी समस्याको समाधान, श्रमिकका समस्या समाधान, कोरोनाकालमा भएको आर्थिक क्षतिको पूर्ति, पर्यटनका लागि लुम्बिनी क्षेत्रको विशेष विकासजस्ता माग राखेका र आफू नागरिकका सबै समस्यासँग परिचित रहेकाले आगामी दिनमा ती सबै समस्या समाधानमा पहल गर्ने प्रतिबद्धता व्यक्त गरेको बताए ।