एसईईमा काठमाडौंबाट ३६ हजार विद्यार्थी सहभागी, ५२६ जना गयल

‘आईईएमआईएसमा महानगरपालिकाभित्रका १८ हजार ५६ विद्यार्थीको नाम दर्ता’

काठमाडौं । आजदेखि सुरू भएको माध्यमिक शिक्षा परीक्षा (एसईई) मा काठमाडौं जिल्लाका ३६ हजार ३६८ विद्यार्थी सहभागी भएका छन् ।

यस्तो देखियो पहिलो दिनको एसईई परीक्षा (फोटो फिचर)

एसईई दिइरहेका विद्यार्थीका लागि ‘टिप्स’

त्यसमध्ये छात्रको संख्या २० हजार ५ जना र छात्राको संख्या १६ हजार ३६३ जना छन् । शिक्षा विकास तथा समन्वय एकाइका प्रमुख विचारीप्रसाद अधिकारीका अनुसार २५६ जना छात्र र २७० जना छात्रा गरी ५२६ जना अनुपस्थित रहे । जिल्लामा १२७ वटा केन्द्रबाट परीक्षा छन् । जसमध्ये काठमाडौँ महानगरपालिकाभित्र ६३ वटा केन्द्र छन् ।

संस्थागत र सामुदायिक गरी देशभरिका १० हजार ८०६ विद्यालयबाट ५ लाख ४ हजार ४१४ विद्यार्थी परीक्षामा सहभागी भएका छन् । यसमा २ लाख ५० हजार ७७२ जना छात्रा, २ लाख ५३ हजार ६२७ जना छात्र र १५ जना यौनिक तथा लैङ्गिक अल्पसंख्यक रहेको इसइई परीक्षा नियन्त्रक कार्यालयले जनाएको छ ।

काठमाडौं महानगरपालिका क्षेत्रका सामुदायिक र संस्थागत गरी ४६७ वटा विद्यालयले एकीकृत शैक्षिक व्यवस्थापन सूचना प्रणाली (आईईएमआईएस) को कक्षागत विवरणमा यस शैक्षिक सत्रको कक्षागत विवरणमा कक्षा १० का १८ हजार ५६ जना विद्यार्थीको विवरण दर्ता गरेका थिए । जसमा ९ हजार ५६७ जना छात्र र ८ हजार ४८९ जना छात्रा छन् ।

५८ वटा सामुदायिक विद्यालयबाट ४ हजार ४५२ जना विद्यार्थीमध्ये २ हजार १८५ जना छात्र र २ हजार २६७ जना छात्रा छन् । १९ वटा बैकल्पिक विद्यालयका १ हजार ६५१ जना विद्यार्थीमध्ये ५८५ जना छात्र र १ हजार ६६ जना छात्रा छन् । ३ वटा धार्मिक विद्यालयबाट ४२ जना विद्यार्थी सहभागी छन् । जसमध्ये ४ जना छात्र र ३८ जना छात्रा छन् । ३८७ वटा निजी विद्यालयहरुबाट ५ हजार ११८ जना छात्र र ६ हजार ७९३ जना छात्रा गरी ११ हजार ९११ जना विद्यार्थी सहभागी भएका छन् ।