शेयर बजारमा उछाल, ६३ दशमलव २४ अंकको वृद्धि

काठमाडौं । नेपाल स्टक एक्सचेञ्ज (नेप्से) साताको कारोबारको पहिलो दिन आज आइतबार उछाल आएको छ । नेपाल राष्ट्र बैंकले मौद्रिक नीति सार्वजनिक गरेको दिन आइतबार सेयर बजार ६३ दशमलव २४ अंकले बढेर २२२७ दशमलव १६ विन्दुमा उक्लिएको छ । यो २ दशमलव ९२ प्रतिशतको वृद्धि हो ।

नेपाल राष्ट्र बैंकले आज मौद्रिक नीति सार्वजनिक गर्ने भएपछि आजको कारोबारको सुरुवाती समयदेखि नै नेप्से परिसूचक बढेको थियो । तर, राष्ट्र बैंकले आइतबार सार्वजनिक गरेको चालु आर्थिक वर्ष २०८०/८१ को मौद्रिक नीतिमा शेयर धितो सम्बन्धीको व्यवस्था परिमार्जन गरिएको छैन । बैंक तथा वित्तीय संस्थाको सुझाव समेतको आधारमा चालुपुँजी कर्जासम्बन्धी मार्गदर्शनमा आवश्यक पुनरावलोकन गरिने मात्रै भनेको छ ।

त्यस्तै, मौद्रिक नीतिमा भएको व्यवस्था अनुसार शेयर धितो कर्जा, रियल स्टेट कर्जा तथा हायर पर्चेज कर्जाका विद्यमान जोखिम भारसम्बन्धी व्यवस्था पुनरावलोकन गरिने भएको छ । यसका साथै धितोपत्र बोर्डबाट स्वीकृति प्राप्त गरेका प्राइभेट इकयुटी फण्डरभेञ्चर क्यापिटल फण्डमा बैंक तथा वित्तीय संस्थाबाट हुने लगानीलाई सहजीकरण गर्न विद्यमान लगानीसम्बन्धी व्यवस्थामा पुनरावलोकन गरिने मौद्रिक नीतिमा उल्लेख छ ।

शेयर बजारसंग सम्बन्धी खास कुनै नयाँ व्यवस्था नभएपनि कारोबार भने चार अर्ब नाघेको छ । नेप्सेमा आज चार अर्ब ३७ करोड ५१ लाख बराबरको कारोबार भएको छ । आज कारोबार भएका १९९ कम्पनीको शेयरमूल्य बढेको छ भने १६ कम्पनीकोे शेयरमूल्य घटेको छ । एक वटा कम्पनीको शेयरमूल्य स्थिर रहेको छ ।

आज ६ कम्पनीको शेयरमूल्यमा उच्च वृद्धि भएको छ । जसमा किसान लघुवित्त वित्तीय संस्था र चन्द्रागिरी हिल्स लिमिटेड रहेका छन् । यी कम्पनीको शेयरमूल्य आज १० प्रतिशतले बढेको छ ।