शेयर बजारमा देखियो सुधारको सङ्केत, यस्तो छ समीक्षा

काठमाडौं । तिहार र छठपछि खुलेको शेयर बजारमा पहिलो साताको कारोबार अवस्था हेर्दा सुधारको सङ्केत देखिएको छ ।

यो साता नेपाल स्टक एक्सचेञ्ज (नेप्से) परिसूचक आठ दशमलव ११ अङ्कले बढेर एक हजार ८६० दशमलव २० को बिन्दुमा कायम भएको छ ।

यो साताको पहिलो कारोबार सोमबार भएको थियो । एक हजार ८५२ दशमलव ०९ को बिन्दुबाट कारोबार सुरु भएको नेप्से परिसूचकमा पहिलो दिन झिनो अङ्कको सुधार देखिएको थियो । सोमबार नेप्से परिसूचक एक दशमलव ३९ अङ्कले बढेर एक हजार ८५३ दशमलव ४८ अङ्कमा कायम भएको थियो ।

सातामा कारोबारको दोस्रो दिन नेप्से परिसूचकमा २३ दशमलव ८२ अङ्कको गिरावट देखियो । मङ्गलबार परिसूचक एक दशमलव २८ प्रतिशतले घटेर एक हजार ८२९ दशमलव ६५ को बिन्दुमा कायम भएको थियो । त्यस्तै, तेस्रो दिन बुधबार परिसूचक २० दशमलव ६७ अङ्कले बढेर एक हजार ८५० दशमलव ३३ अङ्कमा कायम भएको थियो भने साताको अन्तिम दिन बिहीबार नौ दशमलव ८७ प्रतिशतले बढेर एक हजार ८६० दशमलव २० अङ्कमा कायम भएको छ ।

यो सातामा रू. चार अर्ब ४८ करोड ५२ लाख ४३ हजार ५३९ बराबरको कारोबार भएको छ । सातामा कारोबार भएका शेयर सङ्ख्या एक करोड ५६ लाख २८ हजार ४६२ कित्ता बराबर रहेको छ ।

यो साताको पहिलो दिनको कारोबारपछि रू. २८ खर्ब ५७ अर्ब ७५ करोड ९० लाख १० हजार बराबर रहेको बजार पुँजीकरण अन्तिम दिनको कारोबारपछि २८ खर्ब ६८ अर्ब १२ करोड तीन लाख ६० हजार कायम भएको छ । एक सातामा बजार पुँजीकरण रू. १० अर्ब ३६ करोड १३ लाख ५० हजारले बढेको हो ।