ईन्धन संकटपछि पाकिस्तानमा सरकारी कर्मचारीको तलब ५ देखि ३० प्रतिशतसम्म घट्यो

काठमाडौँ । पाकिस्तानमा ईन्धन संकट बढेपछि सरकारले सरकारी खर्च घटाउन कर्मचारी तलबमा कटौती गर्ने निर्णय गरेको छ । प्रधानमन्त्री शाहबाज शरीफको नेतृत्वमा बसेको उच्चस्तरीय बैठकले सरकारी कम्पनी तथा स्वायत्त संस्थानका कर्मचारीको तलब ५ देखि ३० प्रतिशतसम्म घटाउने निर्णय गरेको हो ।

सरकारका अनुसार, यस कटौतीबाट बचाइएको रकम सामान्य जनतालाई राहत दिने कार्यमा प्रयोग गरिनेछ । यससँगै सरकारी खर्च घटाउन अन्य कदमहरू पनि लिइएको छ । सरकारी सवारीसाधनका लागि इन्धनको वितरण ५० प्रतिशत घटाइनेछ भने आगामी दुई महिनामा ६० प्रतिशत सरकारी सवारीसाधन सडकबाट हटाइने व्यवस्था मिलाइएको छ ।

सरकारले नयाँ सरकारी सवारी खरिद र अन्य सरकारी खरिदमा रोक लगाएको छ । साथै मन्त्री, अधिकारी र विशेष सहयोगीहरूको विदेशी भ्रमणमा पनि प्रतिबन्ध जारी रहनेछ । प्रधानमन्त्री कार्यालयले मन्त्री, सल्लाहकार र विशेष सहयोगीको आगामी दुई महिनाको तलब पनि सार्वजनिक कल्याणका लागि प्रयोग गरिने जनाएको छ ।

पाकिस्तानमा हाल अमेरिकासहित ईरानसँगको द्वन्द्वका कारण इन्धनको मूल्य बढेको छ । गत हप्ता पेट्रोलियमको मूल्य प्रतिलिटर ५५ रुपैयाँ बढेर ३२१ पाकिस्तानी रुपैयाँ पुगेपछि सरकारले खर्च घटाउने कदम उठाउन बाध्य भएको हो।