सिद्धार्थ प्रिमियर इन्स्योरेन्सलाई ‘नन–लाइफ इन्स्योरेन्स अफ द इयर’ अवार्ड (भिडिओ)

काठमाडौं । निर्जीवन बीमा कम्पनी सिद्धार्थ प्रिमियर इन्स्योरेन्सले ‘नन–लाइफ इन्स्योरेन्स अफ द इयर’ अवार्ड प्राप्त गरेको छ ।

कर्पोरेट म्यागजिनले कम्पनीलाई सो अवार्ड प्रदान गरेको हो ।

बिहीबार र्‍याडिसन होटेलमा आयोजित १७औँ संस्करणको ‘कर्पोरेट बिजनेश अवार्ड’ समारोहमा कम्पनीलाई ‘नन–लाइफ इन्स्योरेन्स अफ द इयर’ अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कम्पनीका तर्फबाट प्रमुख कार्यकारी अधिकृत (सीईओ) वीरेन्द्र बहादुर बैदवार क्षेत्रीले अवार्ड ग्रहण गर्नुभयो । कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासंघ (एफएनसीसीआई) की पूर्व अध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

सिद्धार्थ प्रिमियर इन्स्योरेन्स र वीरेन्द्र बहादुर बैदवार क्षेत्रीबारे

साविकको सिद्धार्थ इन्स्योरेन्स र प्रिमियर इन्स्योरेन्स मिलेर बनेको सिद्धार्थ प्रिमियर इन्स्योरेन्स लिमिटेड आईएसओ ९००१ : २०१५ प्रमाणित कम्पनी हो । सिद्धार्थ बैंक, प्रमुख व्यापारिक समूहहरू, उद्योगपतिहरू र सफल उद्यमीहरूद्वारा प्रवद्र्धित यो कम्पनी १२८ वटा शाखाका साथ देशव्यापी रूपमा फैलिएको छ ।

६०० जनाभन्दा बढी कर्मचारीहरू कार्यरत रहेको सिद्धार्थ प्रिमियर इन्स्योरेन्सले प्रोपर्टी, मोटर, मेरिन, इन्जिनीयरिङ, एभिएशन, लाइभस्टक एण्ड कोर्पस्, माइक्रो र मिसेलेनियस जस्ता विभिन्न बीमा सेवाहरू प्रदान गर्दै आइरहेको छ ।

प्रख्यात पुनर्बीमा कम्पनीहरूसँगको सहकार्यबाट जस्तोसुकै घटना र बोझ आइपरे पनि सहन सक्ने क्षमतायुक्त कम्पनीको प्रमुख कार्यकारी अधिकृतमा वीरेन्द्रबहादुर बैदवार क्षेत्री हुनुहुन्छ । नेपालको निर्जीवन बीमा क्षेत्रमा अब्बल व्यवस्थापकीय नेतृत्व सीपले युक्त बैदवार निर्जीवन बीमा क्षेत्रमा करिब तीन दशकदेखि सक्रिय रही नेतृत्वदायी भूमिका निर्वाह गर्दै आउनुभएको छ । सिद्धार्थ प्रिमियर इन्स्योरेन्सको सीईओका रूपमा उहाँले २०२३ मार्चदेखि कार्यभार सम्हाल्नुभएको हो ।

आफ्नो बलियो रणनीतिक योजनासहितको उच्च व्यावसायिक दक्षतामार्फत आफू आबद्ध संस्थालाई सफलताको नयाँ मोड दिलाउन सफल हुनुहुन्छ । उत्कृष्ट नेतृत्व क्षमता राख्ने, संस्थागत सुशासनको पालना गर्ने तथा नाफामुखी कार्यसंस्कृति अभिवृद्धि गर्ने सीईओका रूपमा उहाँको परिचय छ ।

वीरेन्द्रबहादुर बैदवार क्षेत्रीले अगस्ट २०१७ देखि फेब्रअरी २०२३ सम्म साविकको सिद्धार्थ इन्स्योरेन्स लिमिटेडमा प्रमुख कार्यकारी अधिकृत (सीईओ) को जिम्मेवारी सम्हाल्नुभयो । त्यसअघि उहाँ यही कम्पनीमा अप्रिल २०१४ देखि जुलाई २०१७ सम्म कार्यवाहक सीईओ र जुलाई २००६ देखि मार्च २०१४ सम्म वरिष्ठ प्रबन्धक हुँदै उपमहाप्रबन्धकको भूमिकामा रहनुभयो । त्यसैगरी, सन् १९९९ देखि २००५ सम्म सगरमाथा इन्स्योरेन्स लिमिटेडमा व्यवस्थापकका रूपमा र १९९४ देखि १९९९ सम्म युनाइटेड इन्स्योरेन्स लिमिटेडमा अधिकृतका रूपमा काम गर्नुभयो । निर्जीवन बीमा क्षेत्रमा उहाँको प्रवेश सन् १९९१ मा ओरियन्टल इन्स्योरेन्स लिमिटेडमा सहायक पदबाट सुरू भएको थियो ।

काठमाडौं महनगरपालिका–१०, बुद्धनगर निवासी उहाँले हिमालयन ह्वाइट हाउस इन्टनेशनल कलेज काठमाडौंबाट व्यवसाय प्रशासनमा स्नातकोत्तर गर्नुभएको छ ।