एसएम टेक टेक्नोलोजीका सीईओ सुरेश पाण्डेलाई ‘कर्पोरेट एक्सिलेन्स इन आईटी अवार्ड’ (भिडिओ)

काठमाडाैं । अत्याधुनिक प्रविधि समाधानहरू विकास गर्ने कम्पनी एसएम टेक टेक्नोलोजीका प्रमुख कार्यकारी अधिकृत (सीईओ) सुरेश पाण्डेले ‘कर्पोरेट एक्सिलेन्स इन आईटी अवार्ड, २०२५’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा उहाँलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

सुरेश पाण्डे र एसएम टेक टेक्नोलोजीबारे

वि.स. २०४३ कात्तिक १७ गते पिता ताराबहादुर पाण्डे र माता कृष्णकुमारी पाण्डेको कोखबाट पर्वतमा जन्मिनुभएका सुरेश पाण्डे अत्याधुनिक प्रविधि समाधानहरू विकास गर्ने कम्पनी एसएम टेक टेक्नोलोजीको सीईओ तथा स्मार्ट टेक बायो इनर्जीको अध्यक्ष हुनुहुन्छ । एसएम टेकले स्टक व्यवस्थापन, लेखा प्रणाली, बिलिङ, कर व्यवस्थापन र समग्र व्यापार सञ्चालनलाई सहज बनाएको छ भने स्मार्ट बायोटेकले बायोमास पेल्लेट्स जस्ता दिगो ऊर्जाका समाधानहरू प्रदान गरिरहेको छ ।

सामान्य पारिवारिक पृष्ठभूमिमा हुर्किनुभएका उहाँ सानैदेखि प्रविधि र नवप्रवर्तनमा रुचि राख्नुहुन्थ्यो । त्यसैकारण उहाँले बिजनेश म्यानेजमेन्टका साथै सूचना प्रविधिसँग सरोकार राख्ने विभिन्न विधाहरूमा शिक्षा हासिल गर्नुभएको छ । नेपाल तथा विदेशमा अध्ययन तथा कार्य अनुभव हासिल गरेपछि व्यावसायिक यात्रामा प्रवेश गर्नुभएका सुरेश पाण्डेले सिस्टम एड्मिनिष्ट्रेटर, डाटाबेस र सिस्टम इन्जिनीयर जस्ता सर्टिफिकेशनहरू प्राप्त गर्नुहुँदै आईटी क्षेत्रमा उत्कृष्ट अनुभवहरू हासिल गर्नुभएको छ ।

साथै विभिन्न व्यावसायिक भोकेशनल ट्रेनिङ र स्वअध्ययनमार्फत आफूलाई निखारिरहनुभएका बिजनेश म्यानेजमेन्ट सफ्टवेयरको विकास, नवप्रवर्तन र डिजिटल रूपान्तरणमा ध्यान दिँदै आउनुभएको छ । पछिल्लो समय उहाँ हरित ऊर्जाको क्षेत्रमा पनि अवसरहरू खोज्न थाल्नुभएको छ ।

नवीन प्रविधिहरू बजारमा स्थापित गर्ने, व्यावसायिक सफ्टवेयर समाधानहरूलाई प्रभावकारी रूपमा कार्यान्वयन गर्ने, लगानी तथा स्रोतसाधन व्यवस्थापन र डिजिटल रूपान्तरणका लागि व्यवसायहरूलाई अभिप्रेरित गर्ने चुनौतीका बाबजुद सही रणनीति, लगनशीलता र गुणस्तरीय समाधानका कारण उहाँले आफ्ना उद्देश्यहरूलाई निरन्तर अघि बढाइरहनुभएको छ । जसले नेपाली समाजलाई आईटीको क्षेत्रमा फड्को मार्न सहज बनाएको छ ।

हेर्नुहोस् भिडिओ–