क्यूमेड फर्मुलेशनका अध्यक्ष सोहन प्रसादलाई ‘एक्सिलेन्स हेल्थकेयर प्रडक्ट अवार्ड’

काठमाडौं । नेपालको अग्रणी औषधि उत्पादक उद्योग क्यूमेड फर्मुलेशनका कार्यकारी अध्यक्ष सोहन प्रसाद अधिकारीले ‘एक्सिलेन्स हेल्थकेयर प्रडक्ट अवार्ड, २०२५’ प्राप्त गर्नुभएको छ ।

कर्पोरेट म्यागजिनले उहाँलाई सो अवार्ड प्रदान गरेको हो ।

बिहीबार काठमाडौंको लाजिम्पाटस्थित र्‍याडिसन होटेलमा आयोजित ‘कर्पोरेट बिजनेश अवार्ड, २०२५’ समारोहमा उहाँलाई सो अवार्ड प्रदान गरिएको कर्पोरेट म्यागजिनका संस्थापक सम्पादक उज्वलजंग शाहले जानकारी दिनुभयो ।

कार्यक्रमका प्रमुख अतिथि रक्षामन्त्री मानवीर राई, कृषि तथा पशुपक्षी विकासमन्त्री रामनाथ अधिकारी, अवार्ड छनोट समिति संयोजक तथा नेपाल उद्योग वाणिज्य महासङ्घ (एफएनसीसीआई) की पूर्वअध्यक्ष भवानी राणा, कर्पोरेट मिडियाकी उपाध्यक्ष सुष्मा महरालगायतले उहाँलाई अवार्ड प्रदान गर्नुभएको थियो ।

सोहन प्रसाद अधिकारी र क्यूमेड फर्मुलेशनबारे

वि.स. २०२५ असार ९ गते मोरङको विराटनगरमा पिता द्वारिकाप्रसाद अधिकारी र माता गायत्रीदेवी अधिकारीका सन्तानको रूपमा जन्मनुभएका सोहनप्रसाद अधिकारी एक सफल र उदाहरणीय औषधि उत्पादक उद्यमी हुनुहुन्छ । उहाँ मानिस र पशुपक्षी दुवैका लागि करिब दुई दशकदेखि गुणस्तरीय औषधि उत्पादन तथा बिक्रीवितरण गर्ने डब्लयूएचओ–जीएमपी प्रमाणित कम्पनी क्यूमेड फर्मुलेशन प्रालिका कार्यकारी अध्यक्ष हुनुहुन्छ ।

काठमाडौंको क्षेत्रपाटी स्थायी घर भए पनि उहाँका बुबा बैंकको जागिरको सिलसिलामा परिवारसहित विराटनगर बस्नुभएका कारण सोहन प्रसाद अधिकारीको जन्म विराटनगरमा भएको हो । जागिरे पृष्ठभूमिको परिवारमा जन्मनुभएका उहाँको बाल्यकाल समग्रमा सुखद नै रह्यो । १४ वर्षको उमेरमा एसएलसी उत्तीर्ण गर्नुभएका उहाँले त्यसपछि एक निजी संस्थामा तीन वर्ष, नेपाल बैंकमा सात वर्ष र औषधि बिक्री प्रतिनिधिका रूपमा सात वर्ष गरी १७ वर्ष जागिरे जीवन बिताउनुभयो ।

विराटनगरस्थित जनता नमुना माध्यमिक विद्यालयबाट औपचारिक अध्ययनको सुरुआत गर्नुभएका अधिकारीले काठमाडौंस्थित शङ्करदेव क्याम्पसबाट व्यवस्थापन सङ्कायमा एमबीएसम्मको अध्ययन पूरा गर्नुभएको छ । औषधिसम्बन्धी बिक्री प्रतिनिधिमा काम गर्दागर्दै व्यवासय गर्ने विचार जागेपछि उहाँले अन्य उत्पादक कम्पनीसँगको सहकार्यमा औषधि कन्ट्राक्ट म्यानुफ्याक्चरिङ गराएर बजारीकरणको काम थाल्नुभयो ।

ब्राण्ड आफ्नो भए पनि अर्काको उद्योगमा उत्पादन गरिरहने विषय सधैँ सुरक्षित रहन नसक्ने ठानेर उहाँले साथीभाइ, नातागोताको साझेदारीमा सन् २०११ मा क्यूमेड फर्मुलेशनमार्फत औषधि उत्पादन सुरु गर्नुभयो । भक्तपुरको छालिङमा स्थापित सो उद्योगमा सानाठूला गरी झण्डै ४५ जनाको लगानी छ । अहिले कोटेश्वर महादेवस्थान मार्गमा यसको कर्पोरेट कार्यालय सञ्चालित छ । कुनैबेला बजारमा पुँजीको अभाव र ब्याजदर उच्च रहेको, लगानीका लागि अतिरिक्त पुँजी नभएको अवस्थामा नयाँ साझेदारहरू थप्दै अधिकारीले विभिन्न समस्याका बावजुद पनि व्यावसायिक यात्रालाई निरन्तरता दिँदै जानुभयो ।

आफ्नो सफलतामा धर्मपत्नी लता ढुङ्गेल अधिकारीको महत्वपूर्ण साथ पाउनुभएका अधिकारीका जेठी छोरी इशु अधिकारी औषधिविज्ञानमा किङ्स्टन युनिभर्सिटी लण्डनबाट स्नातकोत्तर गरी क्यूमेड फर्मुलेशनमै हातेमालो गरिरहनुभएको छ । त्यस्तै, कान्छी छोरी रीजु अधिकारी युनिभर्सिटी अफ सिड्नी, अष्ट्रेलियामा मार्केटिङ र स्ट्राटेजीमा स्नातकोत्तर अध्ययन गरिरहनुभएको छ ।

क्यूमेड फर्मुलेशन आन्तरिक राजस्व कार्यालय भक्तपुरबाट सबैभन्दा बढी आयकर दाखिला गर्ने कम्पनीका रूपमा तीन पटक सम्मानित भएको छ । नेपालमा साझेदारी व्यवसाय गरेर सफलता पाउन कठिन हुन्छ भन्ने भाष्यलाई अधिकारीले गलत साबित गरिदिनुभयो । उहाँले नेपाल पशुपक्षी औषधि व्यवसायी सङ्घको राष्ट्रिय अध्यक्ष भएर पनि जिम्मेवारी सफलतापूर्वक निर्वाह गरिसक्नुभएको छ ।

हेर्नुहोस् भिडिओ–